२० भाद्र २०७५, बुधबार ०४:३१ बुधवार साप्ताहिक, नयाँबानेश्वर, काठमाण्डौं

सिन्धुलीमा एकैदिन दुई शाखारहित बैंकिङ सेवा

काठमाडौं । मेगा बैंक नेपाल लिमिटेडले एकै दिन सिन्धुली जिल्लाका दुई स्थानमा शाखारहित बैंकिङ सेवा सञ्चालनमा ल्याएको छ ।
सिन्धुलीको तीनपाटन गाउँपालिका–१ बेलघारी र सोही गाउँपालिकाको वडा ११ चकमकेमा मेगा बैंकले शाखारहित बैंकिङ सेवा सञ्चालनमा ल्याएको हो । तीनपाटन–१ बेलघारीमा शाखारहित बैंकिङ सेवाको उद्घाटन गर्दै वडाध्यक्ष गोविन्दबहादुर राउतले बेलघारीका जनताहरूको विगत १० वर्षदेखि गाउँबाटै बैंकिङ सेवा पाउने सपना अहिले आएर मेगा बंैक नेपाल लिमिटेडले साकार गरिदिएको भन्दै खुसी व्यक्त गरे ।
यसैगरी, तीनपाटन–१० का वडाध्यक्ष पुण्यहरि भुजेलले चकमकेजस्तो जिल्लाकै विकट स्थानमा आफ्नो सेवा विस्तार गरेकोमा मेगा बैंकलाई धन्यवाद दिँदै स्थानीय जनप्रतिनिधिको हैसियतमा आफूले सक्दो सहयोग गर्ने बताए ।
मेगा बैंकका माइक्रो बैंकिङ विभागका अधिकृत शिबहरी भण्डारीले एक सय भन्दा बढी शाखा कार्यालय तथा १ सय १९ शाखारहित बैंकिङ सेवामार्फत मेगा बैंकले देशका विभिन्न स्थानबाट बैंकिङ सेवा प्रदान गराउँदै आएको जानकारी दिए ।
मेगा बैंकका सिन्धुली शाखा प्रबन्धक केशवप्रसाद देवकोटाले मेगा बंैकको खाता खोल्ने, रकम जम्मा गर्ने, झिक्ने र १० लाखसम्मको सरल कर्जा शाखारहित बंैकिङबाट उपलब्ध हुने जानकारी गराए ।