२१ मंसिर २०८०, बिहीबार ०२:२० बुधवार साप्ताहिक, नयाँबानेश्वर, काठमाण्डौं

विराटनगरमा आगोमा जलेर २ को मृत्यु, ४ घाइतेलाई हेलिकप्टरमार्फत काठमाडौँ ल्याइयो

मंसिर २१, काठमाडौं । मोरङको विराटनगरमा आगलागीमा परेर दुई जनाको मृत्यु भएको छ। घटनामा चारजना गम्भीर घाइते भएका प्रहरीले जनाएको छ ।

विराटनगर महानगरपालिका- ७ सातघुम्तीमा रहेको कवाडी गोदाममा बुधबार दिउँसो भएको आगलागीमा परेर गोदामका सञ्चालक स्थानीय ४० वर्षीय दिपक मण्डल र पहिचान नखुलेकी एक महिलाको मृत्यु भएको जिल्ला प्रहरी कार्यालय मोरङले जनाएको छ । उनीहरु दुबैको शव न्युरो अस्पताल विराटनगरमा राखिएको छ । आगलागीमा परेर महिलाको घटनास्थलमै र मण्डलको उपचारको क्रममा क्रममा न्यूरो अस्पताल विराटनगरमा मृत्यु भएको हो ।
आगलागीमा परेर विराटनगर–६ की ६० वर्षीया रीता सरदार, विराटनगर–६ कै ६५ वर्षीया सुशीला पासवान, मोरङको कटहरी गाउँपालिका–६ की ३० वर्षीया पिंकी कामत र विराटनगर–६ का ५८ वर्षीय किशोर कामत घाइते भएका छन् । घाइतेमध्ये रीता र सुशीलाको अवस्था गम्भीर रहेको र घाइते चारै जनालाई उपचारका लागि बुधबार साँझ नेपाली सेनाको स्काई ट्रक (हेलिकप्टर)मार्फत् काठमाडौँ लगिएको जिल्ला प्रहरी कार्यालय मोरङका प्रवक्ता डीएसपी रञ्जन दाहालले जानकारी दिए।