४ पुष २०७५, बुधबार ०५:३० बुधवार साप्ताहिक, नयाँबानेश्वर, काठमाण्डौं

विदेश पठाउने नाममा पुरानै धन्दा

काठमाडौं । डेढ वर्ष कैद भुक्तान गरी सात महिनाअगाडि जेलबाट रिहा भएका खोटाङका लाक्पा तेम्बा शेर्पाले फेरि पुरानै धन्दा सुरु गरेका छन् । जापान र दक्षिण कोरिया पठाउने नाममा दर्जन व्यक्तिसँग लाखौं रुपैयाँ ठगी गरेको अभियोगमा शेर्पालाई तत्कालीन समयमा महानगरीय अपराध महाशाखाले पक्राउ गरेको थियो ।
कैद सजाय पुरा गरेर आएका उनले फेरि ठगीभन्दा चलाएपछि उनको खोजी सुरु भएको छ । त्यसबेला महाशाखाका प्रमुख हालका आईजीपी सर्वेन्द्र खनाल थिए । पर्यटक भिसामा जापान पुगेका चार जनाको भिसा सकिएपछि जापानको जेलमा नौ महिना सजाय काटेर नेपाल फर्किएका पीडितको जाहेरीको आधारमा शेर्पा पक्राउ परेका थिए ।
शेर्पाको पक्राउपछि दर्जन पीडित प्रहरीकोमा उजुरी लिएर पुगेका थिए । त्यही पीडितहरूले सहयोग गरेपछि प्रहरीले उनलाई थप प्रमाणका आधारमा मुद्दा चलाएको थियो । उनी नेपालमा ठगी गरी जापान र जापानमा ठगी गरेर नेपालमा लुकुछिपी बस्दै आएका थिए । तत्कालीन समयमा शेर्पाले दक्षिण कोरियामा राम्रो कम्पनीमा काम लगाइदिन्छु भन्दै दोलखाका साङ्गे शेर्पासहित चार जनाबाट रकम उठाएर जापान भागेका थिए । शेर्पाले पाँच जनाबाट प्रतिव्यक्ति ११ लाख ५० हजार रुपैयाँ लाग्ने भन्दै ४६ लाख रूपैयाँ लिई जापान फरार भएको प्रहरीको अनुसन्धाबाट खुलासा भएको थियो । जापान पुगेर पनि शेर्पाले नर्बु छिरिङ गुरुङमार्फत अन्य चार जनाबाट दक्षिण कोरिया नै पठाइदिन्छु भनी ८ लाख रुपैयाँ ठगी गरेका थिए । शेर्पाले तत्कालीन समयमा रोयल स्टार ट्राभल्स प्रालिको नाममा काम गर्दै आएका थिए । गाइडको काम गर्ने शेर्पाले विदेशीहरूसँग सम्पर्क बढाई विदेशीहरूको स्पोन्सरमार्फत जापानको भिजिट भिसा लगाई जापान लगी अलपत्र बनाउँदै ठगी धन्दा चलाएका थिए । दुई वर्षको जेल बसाइपछि पनि शेर्पाले उही गैरकानुनी पेसा अँगालेको बताइएको छ । उनले फेरि विभिन्न सूत्रहरूमार्फत बाहिर पठाइदिने भन्दै विभिन्न व्यक्तिसँग रकम असुल्न थालेका छन् । समयमै सम्बन्धित निकायको ध्यान नजाने हो भने फेरी बेरोजगार युवाहरू बगिने र अलपत्र पर्ने सम्भावना रहेको बताइन्छ ।