१४ श्रावण २०७७, बुधबार ०५:४६ बुधवार साप्ताहिक, नयाँबानेश्वर, काठमाण्डौं

पत्रकार सहायता कोषमा सहयोग जारी

काठमाडौँ । नेपाल पत्रकार महासङ्घ काठमाडौँ शाखालाई वाङ्ला पब्लिक सेफ्टी ट्रेडिङ सेन्टरका प्रमुख प्रा.डा. भरत आचार्यले १० हजार रुपैया प्रदान गरेका छन् । आइतबार शाखा कार्यालय भृकुटीमण्डपमा आयोजित कार्यक्रममा वृद्ध, अशक्त र गम्भीर रोगका विरामी पत्रकारलाई सहायता गर्न स्थापना गरिएको कोषमा जम्मा गर्न सञ्चालक भरत आचार्यले शाखाका अध्यक्ष शन्तराम बिडारीलाई उक्त रकम प्रदान गरेका हुन् । यसअघि सेन्टरले शाखालाई करिब रु २५ हजार मूल्यको किटनाशक औषधि छर्कने दुई यन्त्रका साथै केही औषधि प्रदान गरेको थियो ।
त्यसैगरी झील्को डटकमका कार्यकारी सम्पादक कृष्ण लेकालीले पनि सोही कोषमा जम्मा गर्न १० हजार प्रदान गरेका छन् । समाचार सङ्कलन तथा प्रवाहमा खटिएका सञ्चारकर्मी गम्भीर रोग लागेर विरामी पर्दा सहयोग गर्ने उद्देश्यले कोष स्थापना गरिएको महासंघ काठमाडौं शाखाले जनाएको छ । आगामी भदौसम्म कोषमा कम्तिमा ५ लाख रुपैंया पु¥याउने लक्ष्य राखिएको छ ।
अध्यक्ष बिडारीले आफ्नो जन्मदिनका अवसरमा गत असार २९ गते १० हजार प्रदान गरेर सुरुवात गरेको कोषमा अहिलेसम्म रू ५५ हजार सङ्कलन भइसकेको र विभिन्न सङ्घ संस्था तथा समाजसेवीबाट सहयोगका लागि रकम थपिने प्रतिबद्धता आइरहेको जनाइएको छ ।