४ जेष्ठ २०८३, सोमबार ०४:५६ बुधवार साप्ताहिक, नयाँबानेश्वर, काठमाण्डौं

बुटवलमा तालिम, परीक्षण र उद्योगी अन्तरक्रिया एकसाथ

बुटवल । लघु घरेलु तथा साना उद्योग प्रवर्द्धन केन्द्रको आर्थिक सहयोगमा बुटवल टेक्निकल इन्स्टिच्युटद्वारा सञ्चालित ३९० घण्टे तालिमअन्तर्गत प्रयोगात्मक परीक्षा तथा कार्यस्थल प्रशिक्षण सम्बन्धी अभिमुखीकरण कार्यक्रम सम्पन्न भएको छ ।

कार्यक्रममा विभिन्न उद्योगी व्यवसायीहरूको सक्रिय सहभागिता रहेको थियो । कार्यक्रममा लघु घरेलु तथा साना उद्योग प्रवर्द्धन केन्द्रका प्रमुख श्री बेद प्रसाद खरेल तथा प्राविधिक प्रमुख श्री निराजन पुडासैनीले तालिमको अवलोकन गर्दै उद्योगी व्यवसायी तथा प्रशिक्षार्थीहरूसँग अन्तरक्रिया गर्नुभएको थियो ।

अन्तरक्रियाका क्रममा उद्योगीहरूले तालिमले दक्ष जनशक्ति उत्पादनमा महत्वपूर्ण भूमिका खेलेको बताएका थिए । प्रशिक्षार्थीहरूलाई उद्योगसँग प्रत्यक्ष रूपमा जोड्ने उद्देश्यले सञ्चालन गरिने कार्यस्थल प्रशिक्षणले व्यवहारिक ज्ञान र सीप विकासमा थप सहयोग पुग्ने विश्वास व्यक्त गरिएको थियो ।

कार्यक्रममा सहभागीहरूले सीपमूलक तालिमलाई रोजगार तथा स्वरोजगारसँग जोड्न आवश्यक रहेकोमा जोड दिएका थिए । साथै, तालिमबाट प्राप्त ज्ञानलाई व्यवहारमा उतार्दै उद्योग क्षेत्रको आवश्यकता अनुसार दक्ष जनशक्ति उत्पादन गर्न यस्ता कार्यक्रम प्रभावकारी हुने धारणा व्यक्त गरिएको थियो ।

कार्यक्रमका विभिन्न झलकहरूले प्रशिक्षार्थीहरूको उत्साह, उद्योगीहरूसँगको अन्तरक्रिया तथा व्यवहारिक अभ्यासलाई आकर्षक रूपमा प्रस्तुत गरेका थिए ।