५ जेष्ठ २०८३, मंगलवार ०९:१९ बुधवार साप्ताहिक, नयाँबानेश्वर, काठमाण्डौं

देशभर लागूऔषध तस्करीविरुद्ध प्रहरीको निगरानी कडा

काठमाडौं । नेपालका विभिन्न जिल्लामा प्रहरीले सोमबार सञ्चालन गरेको लागूऔषध नियन्त्रण अभियानका क्रममा गाँजा, ब्राउनसुगर, खैरो हेरोइन तथा अन्य प्रतिबन्धित औषधिसहित दर्जनभन्दा बढी व्यक्तिलाई पक्राउ गरेको छ। काठमाडौंदेखि झापा र कैलालीसम्म भएका छुट्टाछुट्टै कारबाहीमा ठूलो परिमाणमा लागूऔषध बरामद गरिएको प्रहरीले जनाएको छ।

काठमाडौंको पशुपति क्षेत्रबाट प्रहरीले करिब ३ सय ५० ग्राम गाँजासहित २५ वर्षीय खिमराज कठायतलाई पक्राउ गरेको छ। उनी ललितपुरको बालकुमारीमा बस्दै आएका थिए। त्यस्तै बुढानिलकण्ठबाट ६० वर्षीया साईली तामाङलाई करिब ३ किलो गाँजासहित नियन्त्रणमा लिइएको प्रहरीले जनाएको छ।

काठमाडौंकै कपन क्षेत्रमा प्रहरीले डाईजेपाम, नोर्फिन र फेनारगन एम्पुलसहित दुई जनालाई पक्राउ गरेको छ। प्रहरीले विशाल आङ्देम्बेको कोठामा खानतलासी गर्दा उक्त लागूऔषध फेला पारेको जनाएको छ।

सुनसरीको धरानमा ट्रामाडोल र डिकोलिक गरी ४ हजार ट्याब्लेटसहित दुई युवक पक्राउ परेका छन्। उता कञ्चनपुरमा प्रहरीले दुई जनाको घरबाट खैरो हेरोइनजस्तो पदार्थ बरामद गरेको छ।

सिन्धुलीमा जनकपुरबाट काठमाडौं आउँदै गरेको हायस गाडीमा सवार दुई जनाबाट ६८ ग्रामभन्दा बढी खैरो हेरोइनजस्तो पदार्थ बरामद भएको प्रहरीले जनाएको छ। कैलालीका विभिन्न स्थानबाट पनि ब्राउनसुगरसहित केही व्यक्तिलाई पक्राउ गरिएको छ।

रौतहट, झापा र मकवानपुरमा समेत लागूऔषध कारोबारीविरुद्ध कारबाही जारी राखिएको प्रहरीले जनाएको छ। झापामा मात्रै खैरो हेरोइन र ब्राउनसुगरसहित पाँच जनाभन्दा बढी व्यक्ति पक्राउ परेका छन्।

प्रहरीका अनुसार पक्राउ परेकामाथि लागूऔषध सम्बन्धी कसुरअन्तर्गत थप अनुसन्धान भइरहेको छ। पछिल्लो समय लागूऔषध ओसारपसार तथा कारोबार बढ्दै गएको भन्दै प्रहरीले सीमा क्षेत्र र शहरी क्षेत्रमा निगरानी कडा बनाएको जनाएको छ।