१० मंसिर २०७८, शुक्रबार ०२:४८ बुधवार साप्ताहिक, नयाँबानेश्वर, काठमाण्डौं

एमाले १०औं राष्ट्रिय महाधिवेशनकाे आज उद्घाटन

१० मंसीर, चितवन । प्रमुख प्रतिपक्षी दल नेकपा (एमाले)को १०औं राष्ट्रिय महाधिवेशन आजदेखि चितवनमा शुरु हुँदैछ । १२ मंसिरसम्म चल्ने महाधिवेशनले नयाँ नेतृत्व चयन गर्नेछ । नारायणी नदी तटमा महाधिवेशनको उद्घाटन एमाले अध्यक्ष केपी ओलीले मध्याह्न १२ बजे गर्ने कार्यक्रम छ ।

एमाले विभाजन पश्चात पहिलो पटक महाधिवेशन हुन लागेको हो । महाधिवेशन मूल व्यवस्थापन समितिका सहसंयोजक सुरेन्द्र पाण्डेले उद्घाटन कार्यक्रमका लागि देशभरबाट उपस्थित हुने पाँच लाखभन्दा बढी सहभागी हुने दावी गरेका छन् ।

उद्घाटन कार्यक्रममा प्रधानमन्त्री एवं कांग्रेस सभापति शेरबहादुर देउवालगायत सात पार्टीका प्रमुख नेता सहभागी हुने छन् । जसपाका अध्यक्ष उपेन्द्र यादव, लोसपाका अध्यक्ष महन्थ ठाकुर, राप्रपा अध्यक्ष कमल थापा, राजमोबाट चित्रबहादुर केसी र नेमकिपाका नेतासमेत सहभागी हुनेछन् ।

महाधिवेशनका लागि भारत, बंगलादेश, श्रीलंका, कम्बोडियालगायत १५ देशका अतिथि र अन्य २५ देशबाट शुभकामना सन्देश प्राप्त भएको छ ।

बन्दसत्र सौराहामा हुनेछ । महाधिवेशनमा दुई हजार एक सय ७५ प्रतिनिधि र एक सय २९ पर्यवेक्षक सहभागी हुनेछन् । प्रतिनिधिमध्ये ६ सय २७ जना महिला र दुई सय नौजना दलित–उत्पीडित समूहबाट प्रतिनिधित्व हुनेछन् ।

उद्घाटनकाे दिन विहानैदेखि कार्यक्रमस्थलमा कार्यकर्ताकाे चहलपहल सुरु भइसकेकाे छ । रात्रीबसमा आएकाहरु बिहानै ओर्लिँदा पनि कार्यकर्ताकाे भीड बढेकाे हाे ।