२१ पुष २०७८, बुधबार ०३:१८ बुधवार साप्ताहिक, नयाँबानेश्वर, काठमाण्डौं

शेखर कोइराला पक्षको बैठक आज पनि बस्दै

२१ पुस, काठमाडौं । नेपाली कांग्रेसका नेता शेखर कोइरालाले आज पनि आफू पक्षीय नेताहरूको बैठक आह्वान गरेका छन् ।

पछिल्लो राजनीतिक अवस्थाबारे छलफल गर्न र १४ औं महाधिवेशनको समीक्षा गर्न भन्दै कोइरालाले आज दिउँसो दुई बजे आफू पक्षीय नेताहरुको बैठक बोलाएका हुन् ।

कोइराला निकट नेता बलबहादुर केसीले दिउँसो २ बजे बैठक बस्ने पुष्टि गर्दै स्थान भने निश्चित नभएको बताए ।

कोइराला निकट अर्का एक नेता चन्द्र भण्डारीले भने बैठक सिंहदरबार नजिकको बसेरा होटलमा बस्ने बताए । नेता भण्डारीका अनुसार १४ औं महाधिवेशनमा उम्मेदवार बनेकाहरुलाई बैठकमा बोलाइएको छ ।

कोइराला पक्षीय नेताहरुको बैठक मंगलबार पनि बसेको थियो । उक्त बैठकले पार्टी सभापति शेरबहादुर देउवा एकलौटी रुपमा अगाडि बढेको र आफूहरुलाई शक्तिका रुपमा स्वीकार नगरेको निष्कर्ष निकालेको थियो । कांग्रेसको १४ औं महाधिवेशनमा कोइराला सभापति पदमा देउवासँग पराजित भएका थिए ।