२३ भाद्र २०७९, बिहीबार ११:५१ बुधवार साप्ताहिक, नयाँबानेश्वर, काठमाण्डौं

बालुवाटारमा सत्ता गठबन्धनको बैठक

२३ भदौ, काठमाडौं । पाँच दलीय सत्ता गठबन्धनको बैठक बालुवाटारमा जारी छ । सिट बाँडफाँट विषयलाई प्रमुख एजेण्डा बनाएर बैठक बसिरहेको बालुवाटार स्रोतले जनाएको छ ।

मंसिर ४ गते हुने संघ तथा प्रदेशसभा निर्वाचनका लागि सिट बाँडफाँट गर्न सत्ता गठबन्धनले कृष्णप्रसाद सिटौलाको नेतृत्वमा कार्यदल बनाए पनि हालसम्म ठोस निणर्य गर्न सकेको छैन । कुन दलले संघ र प्रदेशको कति सिट लिने, कुन-कुन क्षेत्र लिने भन्ने कुरामै सहमति नजुटेपछि शीर्ष नेताहरुसहितको बैठक बसेको हो ।

माओवादी अध्यक्ष प्रचण्डले कांग्रेसलाई ८० सिट, माओवादीले ६० सिट र बाँकी सिट अन्य दललाई दिने बताएका थिए। तर सत्तारुढ दलमध्ये नेकपा एकीकृत समाजवादी र जनता समाजवादी पार्टीले मनोमानी ढंगबाट सिट बाँडफाँड गरे एक्लै चुनाव लड्ने बताएको छ ।

एकीकृत समाजवादीका अध्यक्ष माधव कुमार नेपाल र जनता समाजवादी पार्टीका अध्यक्ष उपेन्द्र यादवले सार्वजनिकरूपमै सम्मानजनक सिट बाँडफाँट हुने बताउँदै आएका छन् ।