१६ मंसिर २०७९, शुक्रबार ०७:१८ बुधवार साप्ताहिक, नयाँबानेश्वर, काठमाण्डौं

धनगढीमा निषेधाज्ञा तोड्दै प्रदर्शन, पाँच विद्यार्थी पक्राउ

१६ मंसिर, धनगढी । कैलालीको धनगढीमा बिहीबार ग्रेडरको ठक्करबाट १५ बर्षीया बालिका चेतना साउदको मृत्यु भएपछि शुरु भएको प्रदर्शन अझै साम्य हुन सकेको छैन ।

विद्यार्थीहरुले आज पनि निषेधाज्ञा तोड्दै प्रदर्शन जारी राखेका छन् । यसैबीच प्रहरीले पाँच जना विद्यार्थीलाई पक्राउ गरेको छ । पञ्चोदय मावि हसनपुरको कक्षा ८ मा अध्ययनरत साउदलाई साइकलमा विद्यालय गइरहेका बेलामा ग्रेडररले ठक्कर दिएको थियो ।

प्रदर्शन उग्र बनेपछि जिल्ला प्रशासन कार्यालयले हिजोदेखि धनगढीमा निषेधाज्ञा समेत जारी गरेको छ । प्रदर्शनमा उत्रिएका विद्यार्थीलाई नै प्रहरीले पक्राउ गरेपछि अहिले अभिभावक नै प्रदर्शनमा उत्रिएका छन् । निषेधाज्ञा लागु गरिएको घटनास्थल आसपासको क्षेत्रमा जम्मा भएका स्थानीय र विद्यार्थीले चेतनालाई न्याय माग्दै प्रदर्शन गरिरहेका छन् ।

उनीहरुले दोषीलाई कारवाहीको दायरमा ल्याउनुपर्ने र पीडित परिवारलाई उचित क्षतिपूर्ति दिनुपर्ने माग गरेका छन् । बिहीबार बिहान धनगढी उपमहानगरपालिका–५ स्थित पिपलचौतारा नजिकै कालिका कन्सट्रक्सनको ना १ क ९७५ नम्बरको ग्रेडरले ठक्कर दिंदा साइकलमा विद्यालय गइरहेकी १५ वर्षीया साउदको घटनास्थलमै मृत्यु भएको थियो ।

घटनाको विरोधमा बालिका अध्ययनरत पञ्चोदय माध्यमिक विद्यालयका विद्यार्थीले बिहीबार दिनभर धनगढीमा प्रदर्शन गरेका थिए भने आन्दोलनकारी घटनास्थलबाट शव उठाउन दिएका थिएनन् । स्थानीय प्रशासनले बिहीबार साँझ घटनास्थल आसपासको क्षेत्रमा निषेधाज्ञा लागु गर्दै शव उठाएको थियो तर स्थानीयले भने उनको शव लैजाने क्रममा समेत नाराबाजीसहित प्रदर्शन गरेका थिए ।