२४ पुष २०७९, आईतवार ०९:४८ बुधवार साप्ताहिक, नयाँबानेश्वर, काठमाण्डौं

प्रदेश–१ को मुख्यमन्त्रीमा एमालेका हिक्मत कार्की पक्का

२४ पुस,काठमाडौं । प्रदेश–१ मा नेकपा (एमाले) नेतृत्वको सरकार बन्ने पक्का जस्तै देखिएको छ । केन्द्रीय गठबन्धन जस्तै त्यहाँ एमाले, नेकपा (माओवादी केन्द्र) लगायत दलहरू मिलेर सरकार बनाउन लागेका हुन् ।

प्रदेश–१ सभामा एमाले सबैभन्दा ठूलो शक्ति हो । एमालेका ४० प्रदेशसभा सदस्य छन् । त्यहाँ कांग्रेस दोस्रो दल हो । कांग्रेसका २९ सांसद छन् । प्रदेश–१ मा माओवादी केन्द्रका १३, राष्ट्रिय प्रजातन्त्र पार्टी (राप्रपा)का ६, नेकपा (एकीकृत समाजवादी) का चार र जनता समाजवादी पार्टी (जसपा) का एक प्रदेशसभा सदस्य छन् ।

९३ सदस्यीय प्रदेशसभामा बहुमतको सरकार बनाउन ४७ सांसद आवश्यक पर्छ । त्यहाँ एमाले नेतृत्वको गठबन्धनमा ६० सांसद देखिन्छ । मुख्यमन्त्रीका लागि दलहरूको आ–आफ्नै दाबी थियो । तर, केन्द्रको निर्देशानुसार एमालेका हिक्मत कार्कीलाई मुख्यमन्त्री बनाउने तयारी गरिएको स्रोतले जानकारी दियो । कार्की एमाले स्थायी कमिटी सदस्य समेत हुन् ।

माओवादी केन्द्रबाट मुख्यमन्त्रीका दाबेदार रहेका संसदीय दलका नेता इन्द्रबहादुर आङ्बोले एमाले नेतृत्वमा सरकार बन्ने बताएका छन् । ‘मोटामोटी सहमति एमालेको नेतृत्वमा सरकार बन्ने भएको छ । माथिबाट लिखित गर्न मात्र बाँकी छ’, उनले सुनाए । प्रदेश–१ मा आज बेलुका ५ बजेभित्र सरकार गठनका लागि दाबी पेस गर्न दलहरूलाई समय तोकिएको छ ।