१४ असार २०८०, बिहीबार १३:२१ बुधवार साप्ताहिक, नयाँबानेश्वर, काठमाण्डौं

एमालेलाई हमला गरेर कोशी प्रदेशको समस्या हल हुँदैन : योगेश भट्टराई

१४ असार, इलाम । प्रमुख प्रतिपक्षी नेकपा (एमाले) का सचिव योगेश भट्टराईले एमाले र एमाले नेतृत्वलाई हमला गरेर कोशी प्रदेशको समस्या हल नहुने बताएका छन् ।

आज (बिहीबार) मदन भण्डारी फाउन्डेसनको कार्यक्रममा जाने क्रममा ईलाम बजारमा पहिचानवादीले कालो झण्डा देखाएर विरोध गरेपछि भट्टराईले एमाले र एमालेको नेतृत्वलाई हमला गरेर कोशी प्रदेशको समस्या हल नहुने स्पष्ट पारेका हुन् ।

उनले लेखेका छन्, आज मलाई कालो झण्डा देखाउनेहरुको अधिकारका लागि म स्वंयम र म जस्ता लाखौंले लडेर ल्याएको विरोध गर्ने अधिकारको अभ्यास उहाँहरुले गर्नु भएकोमा लोकतन्त्रको संघर्षमा हामीले बिताएको समयले सार्थकता पाएको अनुभूति भएको छ । हाम्रो भनाइ यही छ कि बिरोध शान्तिपूर्ण मान्यताभित्र हुनुपर्छ । उत्तेजनात्मक, निषेधकारी र हिंसात्मक तरिका हामीलाई मान्य छैन । एमाले र एमालेको नेतृत्वलाई हमला गरेर कोशी प्रदेशको समस्या हल हुँदैन । एमाले वार्ता र संवादका लागि हरबखत तयार छ ।