२४ श्रावण २०८०, बुधबार ०७:५० बुधवार साप्ताहिक, नयाँबानेश्वर, काठमाण्डौं

संसदमा आज पनि एमालेको अवरोध, वैठक शुक्रबारसम्म स्थगित

२४ साउन, काठमाडौं । प्रमुख प्रतिपक्षी नेकपा एमालेको अवरोधका कारण प्रतिनिधिसभा बैठक आज (बुधबार) पनि स्थगित भएको छ । बुधबार प्रतिनिधिसभा बैठकमा पनि एमालेले सुन तस्करी प्रकरणको छानबिन गर्न माग गर्दै अवरोध गरेको हो । एमालेको अवरोधपछि सभामुख देवराज घिमिरेले प्रतिनिधिसभा बैठक साउन २६ गते दिउँसो १ बजे बस्ने गरी स्थगित गरेका हुन् ।

बैठकको सुरुमै एमालेका सांसदहरूले उठेर विरोध जनाएपछि सभामुख घिमिरेले सांसद सूर्य थापालाई बोल्न समय दिएका थिए । सांसद थापाले सुन तस्करी प्रकरणको छानबिन गर्न उच्चस्तरीय समिति बनाउन माग गरे । उनले उच्चस्तरीय छानबिन समिति बनाउने सत्तापक्षले मनसाय नदेखाएकाले संसदमा अवरोध कायमै रहने जानकारी गराएका थिए । त्यसपछि एमाले सांसदहरूले वेल घेराउ गर्दै नाराबाजी गरेका थिए ।

एमालेका सांसदहरूले सुशासन कायम गर’, भ्रष्ट र तस्करहरूलाई कारबाही गर, ‘उच्चस्तरीय छानबिन गठन गर’ लगायतका नारा लगाएका थिए । एमालेले सुन तस्करी प्रकरणबारे छानबिन गर्न उच्चस्तरीय छानबिन समिति बनाउन माग गर्दै आएको छ । एमालेकै अवरोधका कारण दुई सातायता प्रतिनिधिसभाको बैठक कार्यसूचीमा प्रवेश नै नगरी स्थगित हुँदै आएको छ ।