१३ कार्तिक २०८०, सोमबार ०४:२७ बुधवार साप्ताहिक, नयाँबानेश्वर, काठमाण्डौं

पतिलाई उपहार दिएको सरकारी गाडी राष्ट्रिय सतर्कताले फिर्ता माग्यो

१३ कात्तिक, काठमाडौं ।काठमाडौं । उपत्यका विकास प्राधिकरणकी प्रमुख आयुक्त जानुका ढकालले आफ्ना पतिलाई उपहार दिएको सरकारी गाडी राष्ट्रिय सतर्कता केन्द्रले तुरुन्त फिर्ता गर्न निर्देशन दिएको छ ।

प्राधिकरणको स्वामित्वमा रहेको ४२५७ नम्बर (सिल्भर कलरको स्कारपियो) को सरकारी गाडी ढकालले आफ्ना पति विनोद पछाइलाई निजी प्रयोजनका लागि उपलब्ध गराएकी छन् ।

यसबारेमा समाचार बाहिरिएपछि सतर्कता केन्द्रले दशंै अगाडि नै प्राधिकरणलाई चिट्ठी लेखी उक्त नम्बरको सरकारी गाडी फिर्ता गर्न निर्देशन दिएको हो ।

केन्द्र स्रोतका अनुसार केन्द्रले पठाएको चिट्ठीमा उक्त गाडी प्राधिकरणलाई फिर्ता नगरी सहरी विकास मन्त्रालयलाई फिर्ता गर्न निर्देशन गरिएको छ ।

प्राधिकरणलाई फिर्ता पठाएमा फेरि दुरुपयोग हुनसक्ने सम्भावना भएकाले मन्त्रालयलाई नै फिर्ता पठाउन निर्देशन गरिएको केन्द्रका एक कर्मचारीले बताए । ती कर्मचारीले भने–‘रातो नम्बर प्लेट राखेर सरकारी गाडीको यसरी दुरुपयोग हुनु भनेको अख्तियारीको चरम दुरुपयोग हो । तुरुन्त फिर्ता नगरेमा हामीले थप कारबाही गर्छौ ।’

यस विषयमा प्रतिक्रिया माग्दा ढकालले सतकर्ताले गाडी फिर्ता मागेको स्वीकार गरिन् । तर उक्त नम्बरको गाडी आफूले प्रयोग गर्ने गरेको दाबी गरिन् । ‘कहिलेकाहीँ म चढेको बेला मलाई गाडी चलाउन आउँदैन, मेरो श्रीमानले चलाउनुहुन्छ । नभए मैले नै फिल्डमा जाँदा प्रयोग गर्छु’ उनले भनिन् ।

४२५७ नम्बर (सिल्भर कलरको स्कारपियो) को सरकारी गाडी काठमाडौं उपत्यका विकास प्राधिकरण मातहतको भक्तपुर जग्गा एकीकरण आयोजनाको स्वामित्वमा छ । तर उक्त गाडी पछाईले केही बर्षदेखि आफ्नै जस्तो गरेर निजी प्रयोग गरिरहेका छन् । यहाँसम्म कि तरकारी बोक्ने, छोराछोरीलाई स्कूल पठाउने घुमघाम गर्ने काम पनि त्यही गाडीबाट गर्दै आएका छन् । उक्त गाडी रातो नम्बर प्लेटको छ ।

त्यसैले पनि पछाईलाई गाडी प्रयोग गर्न सजिलो भएको छ । सरकारको मातहतमा रहेका आयोजनाहरूले रातो नम्बर प्लेट राखेर गाडी गर्न खरिद गर्न सक्छन् तर यस्ता गाडी बढीमा एउटा÷दुई वटा मात्र खरिद गर्न सक्छन । सरकारी बिदाको दिनमा पनि फिल्डमा गई काम गर्नुपर्ने भएकाले जग्गा एकीकरण आयोजनाहरुले रातो नम्बर प्लेटका एउटा–दुई वटासम्म गाडी खरिद गर्न सक्ने छुुट दिइएको हुन्छ ।

‘प्राधिकरणमा आएपछि ढकालले भक्तपुर जग्गा एकीकरण आयोजनासँग रातो नम्बर प्लेटको एउटा गाडी भएको थाहा पाइन्, त्यसपछि प्राधिकरणका लागि भनेर भक्तपुरबाट गाडी मगाइन् । तर उक्त गाडी प्राधिकरणको लागि नभई आफ्नो श्रीमानलाई प्रयोग गर्न दिइन्–स्रोतले भन्यो । यहाँसम्म कि भक्तपुर जग्गा एकीकरण आयोजनाका कर्मचारीहरुले समेत आयोजनाको स्वामित्वमा रहेका गाडी जानुका ढकालका श्रीमानले प्रयोग गरिरहेका छन् भन्ने थाहा पाएका छैनन् ।

यस विषयमा जिज्ञासा राख्दा प्राधिकरणका लागि भनेर आफूहरुले गाडी उपलब्ध गराएको जवाफ उनीहरुले दिने गरेका छन् । ‘हामीले केभीडीएलाई गाडी उपलब्ध गराएका हौं । तर प्रमुख आयुक्तका श्रीमानले निजी प्रयोग गरिरहेका छन् भन्ने थाहा थिएन’ भक्तपुर जग्गा आयोजनाका एक कर्मचारीले भने–‘यो त अति नै भयो । ट्राफिक प्रहरीलाई भनेर गाडी फिर्ता लिनुपर्छ ।’

भक्तपुर जग्गा एकीकरण आयोनजाका आयोजना प्रमुख कृष्ण महर्जन हुन् । उनीसँग सम्पर्क हुन सकेन । तर स्रोत भन्छ–पछाईले गाडी प्रयोग गरिरहेको पछाईलाई समेत थाहा छैन । यो कुरा प्राधिरणका एक दुई जना उच्च कर्मचारीलाई मात्र थाहा छ ।’

पछाई बिजुलीबजार प्रभु बैंकको ओपजिट मूल सडक भेट्ने ठाउँ नजिकै बस्ने गर्छन् । उनले धेरैजसो ४२५७ नम्बरको गाडी सडक नजिकै पार्किङ गरिरहेका हुन्छन्–स्रोत भन्छ ।

ढकालको कार्यसम्पादन क्षमता निकै कमजोर छ । उनी आएपछि काठमाडौं उपत्यकामा विकासको जिम्मा पाएको केभीडीएको प्रगति अत्यन्त लाजमर्दो छ । तत्कालीन सहरी विकास मन्त्री रामकुमारी झाँक्री मन्त्रालयमा आएपछि उनलाई हटाउन धेरै प्रयास गरिन् ।

हटाउनकै लागि दुई पटकसम्म स्पष्टीकरण सोधिन् । तर रमेशकुमार सिंह मन्त्रालयको सचिवको रुपमा फेरि सहरीमा फर्केपछि ढकाललाई हटाउने योजना त्यत्तिकै तुहियो । सिंह सहरीमा रहेसम्म ढकाललाई हटाउने सोच कसैले बनाएनन् । स्रोत भन्छ–अहिले ढकाललाई हटाउने तयारी फेरि भएको छ । उनको कार्यसम्पादनमाथि बारम्बार गुनासो आउन थालेपछि वर्तमान सहरी विकास मन्त्री ढकालसँग खुशी नभएको स्रोतले बतायो ।

नेपालफेसडटकमबाट