३ बैशाख २०८३, बिहीबार ०८:३० बुधवार साप्ताहिक, नयाँबानेश्वर, काठमाण्डौं

धनुषामा पूर्व वडाध्यक्ष मृत फेला, घटनास्थलबाट मदिराका बोतल बरामद

धनुषा । धनुषामा एक पूर्व वडाध्यक्ष मृत अवस्थामा फेला परेका छन्। सबैला नगरपालिका–१२ का पूर्व वडाध्यक्ष प्रदिप महतोको शव बुधबार राति फेला परेको प्रहरीले जनाएको छ।

इलाका प्रहरी कार्यालय सबैलाका प्रहरी निरीक्षक विजय दत्तका अनुसार महतोको शव गणेशमान चारनाथ नगरपालिका–९ स्थित कमला सिँचाइ आयोजनाको पूर्वी नहरअन्तर्गत तीन नम्बर पुलमा राति करिब ११ बजे भेटिएको हो।

प्रहरीका अनुसार घटनास्थलबाट १०–१२ वटा बियर तथा अन्य मादक पदार्थका खाली बोतलहरू बरामद भएका छन्। प्रारम्भिक अनुसन्धानमा महतोले समूहमा बसेर मदिरा सेवन गरेको हुन सक्ने अनुमान गरिएको छ।

‘मृत्युको ठोस कारण खुल्न सकेको छैन। छानबिन र पोस्टमार्टम रिपोर्टपछि मात्रै यकिन हुन्छ,’ प्रहरी निरीक्षक दत्तले बताएका छन्।

घटनास्थलमा महतोसँगै रहेका भनिएका व्यक्तिहरू हाल फरार रहेका छन्। उनीहरूको पहिचान तथा खोजी कार्यलाई प्रहरीले तीव्र बनाएको जनाएको छ।

महतोको शवलाई पोस्टमार्टमका लागि प्रादेशिक अस्पताल, जनकपुर पठाइएको छ।

उल्लेखनीय छ कि महतो २०७४ सालको स्थानीय तह निर्वाचनमा नेकपा एमालेबाट सबैला नगरपालिका–१२ को वडाध्यक्षमा निर्वाचित भएका थिए।

घटनालाई लिएर प्रहरीले विभिन्न कोणबाट अनुसन्धान अगाडि बढाएको छ। मृत्युको वास्तविक कारण पोस्टमार्टम रिपोर्टपछि मात्रै सार्वजनिक हुने बताइएको छ।