३० बैशाख २०८३, बुधबार ११:०५ बुधवार साप्ताहिक, नयाँबानेश्वर, काठमाण्डौं

एसईई नतिजाले झस्कायो: चार विद्यालयबाट एक जना पनि पास भएनन्

काठमाडौं । यस वर्षको माध्यमिक शिक्षा परीक्षा (एसईई) मा मकवानपुरका चार विद्यालयको नतिजा शून्य आएको छ। जिल्लाका चार विद्यालयबाट सहभागी भएका सबै विद्यार्थी अनुत्तीर्ण भएपछि शिक्षा क्षेत्रमा चिन्ता बढेको छ।

प्राप्त विवरणअनुसार राक्सिराङ गाउँपालिकाका तीन विद्यालयको नतिजा पूर्ण रूपमा शून्य आएको हो। राक्सिराङ–४ स्थित कालिका माध्यमिक विद्यालय, राक्सिराङ–६ स्थित राष्ट्रिय माध्यमिक विद्यालय तथा राक्सिराङ–८ स्थित माध्यमिक विद्यालय देवीटारबाट सहभागी भएका कुनै पनि विद्यार्थी उत्तीर्ण हुन सकेनन्। त्यसैगरी भीमफेदी गाउँपालिका–८ स्थित पञ्चकन्या माध्यमिक विद्यालयको नतिजा पनि शून्य रहेको छ।

ग्रामीण तथा दुर्गम क्षेत्रका विद्यालयमा शिक्षण गुणस्तर, शिक्षक अभाव, विद्यार्थीको नियमित उपस्थिति तथा शैक्षिक वातावरण कमजोर हुँदा यस्तो अवस्था दोहोरिएको स्थानीय सरोकारवालाहरूको भनाइ छ। लगातार कमजोर नतिजा आउनुले सरकारी विद्यालयको शिक्षा प्रणालीमाथि गम्भीर प्रश्न उठाएको छ।

गत वर्ष पनि मकवानपुरका चार पालिकाअन्तर्गत सात विद्यालयको एसईई नतिजा शून्य आएको थियो। यसपटक पनि अवस्था सुधार हुन नसक्दा अभिभावक, शिक्षक तथा शिक्षा प्रशासनमाथि थप दबाब बढेको छ।

शिक्षा विज्ञहरूले केवल परीक्षाफललाई दोष दिनुभन्दा विद्यालयको आधारभूत संरचना, शिक्षक व्यवस्थापन, विद्यार्थीको सिकाइ वातावरण र स्थानीय तहको जिम्मेवारीलाई प्रभावकारी बनाउनुपर्ने बताएका छन्।