२ जेष्ठ २०८३, शनिबार १०:५८ बुधवार साप्ताहिक, नयाँबानेश्वर, काठमाण्डौं

परम्परागत इट्टालाई चुनौती दिँदै सीएसईबी प्रविधि लोकप्रिय हुँदै

काठमाडौँ । रुकुम पश्चिम र जाजरकोट मा कम्प्रेस्ड स्ट्याबिलाइज्ड अर्थ ब्लक(सीएसईबी) अर्थात् इन्टरलकिङ इट्टा व्यवसाय विस्तार हुँदै गएको छ । कम लागतमा छिटो तथा सुरक्षित घर निर्माण गर्न सकिने भएकाले यस प्रविधिप्रति स्थानीयको आकर्षण बढ्दै गएको हो ।

निर्माण व्यवसायीहरूका अनुसार परम्परागत रातो इट्टाको तुलनामा यो प्रविधि २५ देखि ४० प्रतिशतसम्म सस्तो पर्ने गरेको छ । साथै, इन्टरलकिङ प्रणालीका कारण इट्टाहरू आपसमा मजबुत रूपमा जडिने भएकाले प्लास्टर गर्नुपर्ने आवश्यकता कम हुन्छ । यसले निर्माण खर्च र समय दुवै बचत गर्ने बताइएको छ ।

भूकम्प प्रतिरोधी संरचना निर्माणका लागि यो प्रविधि प्रभावकारी मानिन्छ । विशेषगरी भूकम्प प्रभावित तथा दुर्गम क्षेत्रमा सुरक्षित र टिकाउ घर निर्माण गर्न सकिने भएकाले पछिल्लो समय यसको प्रयोग बढ्दै गएको छ ।

वातावरणमैत्री मानिने यो प्रविधिमा स्थानीय माटो प्रयोग हुने भएकाले उत्पादन लागत कम हुने र वातावरणीय असर पनि न्यून हुने प्राविधिकहरू बताउँछन् । अहिले निजी घर, विद्यालय तथा सामुदायिक भवन निर्माणमा समेत संपीडित स्थिरीकृत माटोको इट्टाको प्रयोग बढ्न थालेको छ ।

स्थानीय तह तथा निर्माण क्षेत्रसँग आबद्ध व्यक्तिहरूका अनुसार सस्तो, सुरक्षित र दीर्घकालीन आवास निर्माणका लागि यो प्रविधि ग्रामीण नेपालमा प्रभावकारी विकल्प बन्न सक्ने देखिएको छ ।