४ जेष्ठ २०८३, सोमबार ०८:२१ बुधवार साप्ताहिक, नयाँबानेश्वर, काठमाण्डौं

वैशाखमा मालपोत कार्यालयहरूको राजस्व उत्साहजनक

 काठमाडौं । नेपालभर घरजग्गा खरिद–बिक्री तथा नामसारी कारोबारबाट वैशाख महिनामा ६ अर्ब २६ करोड रुपैयाँभन्दा बढी राजस्व संकलन भएको छ। पछिल्लो तथ्यांकले केही समयदेखि उतारचढावमा रहेको घरजग्गा बजार क्रमशः सुधारतर्फ उन्मुख भइरहेको संकेत गरेको छ।

भूमि व्यवस्थापन तथा अभिलेख विभागका अनुसार काठमाडौंस्थित बबरमहल कार्यालयबाट सार्वजनिक गरिएको विवरणअनुसार वैशाख महिनाको राजस्व संकलन चैत महिनाको तुलनामा केही वृद्धि भएको हो। चैतमा ६ अर्ब १६ करोड रुपैयाँ राजस्व संकलन भएको थियो।

कुल ६ अर्ब २६ करोड रुपैयाँ राजस्वमध्ये सबैभन्दा धेरै ३ अर्ब ३१ करोड रुपैयाँ दर्ता शुल्कबाट संकलन भएको छ। त्यस्तै पुँजीगत लाभकरबाट २ अर्ब ५५ करोड रुपैयाँ प्राप्त भएको विभागले जनाएको छ। सेवा करबाट ३४ करोड ४० लाख रुपैयाँ उठेको छ भने मुख्यमन्त्री स्वच्छता कोषका लागि ४ करोड ४८ लाख रुपैयाँ संकलन गरिएको छ।

पछिल्ला महिनामा घरजग्गा बजारमा देखिएको सुधारलाई सकारात्मक संकेतका रूपमा हेरिएको छ। विभागीय तथ्यांकअनुसार फागुन महिनामा ४ अर्ब १४ करोड रुपैयाँभन्दा बढी राजस्व संकलन भएको थियो भने माघमा ५ अर्ब ९९ करोड रुपैयाँभन्दा बढी उठेको थियो।

लगातार दुई महिनादेखि राजस्व संकलनमा वृद्धि देखिनुले घरजग्गा बजार विस्तारै स्थिर र सुधारोन्मुख अवस्थामा प्रवेश गरिरहेको संकेत गरेको सरोकारवालाहरूको भनाइ छ।