२९ माघ २०७१, बिहीबार ०९:४५ बुधवार साप्ताहिक, नयाँबानेश्वर, काठमाण्डौं

संविधानका प्रश्नावली तयार

काठमाडौं । संविधानसभाले पहिलो पटक सर्वाधिक विवादका विषयहरूमा मतदानका लागि प्रश्नावली तयार पारेको छ ।  विवादका विषय भनेर प्रचारित संघीयता, शासकीय स्वरूप र न्याय प्रणालीको विषयमा प्रश्नावली तयार पारिएको हो ।
प्रश्नावली उपसमितिले विवादित भनिएका ती विषयहरूमा प्रश्नावली तयार पारेको हो । उपसमितिले विवादित सबै विषयको प्रश्न तयार पारेर प्रस्ताव समितिमा पेस गरेको छ । उपसमितिले दलहरूबीच देखिएका मुख्य आठ वटा विषयमा केन्द्रित रहेर १ सय ३ वटा विवादका मूल प्रश्न १ सय ९४ वटा र उपप्रश्न ४० वटा तयार पारेको हो ।
उपसमितिले राज्य पुन:संरचनाको विषयमा ५ देखि १४ प्रदेशको खाकामा ७२ वटा प्रश्न तयार पारेर समितिमा पेस गरेको छ । संवाद समितिका प्रतिवदेन, अघिल्लो संविधानसभामा रहेका विवाद र सभासद्हरूका धारणालाई आधार मानेर प्रश्नावली तयार पारेको बताइएको छ । उपसमितिले संविधानको प्रस्तावना, शासकीय स्वरूप, व्यवस्थापिकीय अंगको स्वरूप, संवैधानिक अंगको स्वरूप, न्यायप्रणाली, संविधान संशोधन, मौलिक हक र राज्य पुन:संरचनाका आठ वटा विषयमा रहेका विवादमा केन्द्रित भएर मुख्य र उपप्रश्नसहितको प्रस्ताव तयार पारिसकेको छ । कांग्रेस, एमालेले पेस गरेको सात प्रदेश, एमाओवादीले पेस गरेको १० प्रदेश, जनजाति थारू सभासद्हरूले पेस गरेको १५ प्रदेश र अखण्ड पार्टी नेपालका सभासद् कुमार खड्काले पेस गरेको पाँच प्रदेशको प्रस्ताव अनुसार प्रश्नावली तयार पारिएको बताइएको छ ।