४ बैशाख २०८३, शुक्रबार १०:०० बुधवार साप्ताहिक, नयाँबानेश्वर, काठमाण्डौं

कर्णाली नदीमा डुंगा दुर्घटना: बुबा–छोरा बेपत्ता, खोजी कार्य जारी

कर्णाली । अछाम जिल्लाको तुर्माखाँद गाउँपालिका–३ भैरवस्थानस्थित नदीमा डुंगा पल्टिँदा बुबा–छोरा बेपत्ता भएका छन्। बेपत्ता हुनेमा तुर्माखाँद–३ बल्देका ३५ वर्षीय पहलसिंह बुढा र उनका १३ वर्षीय छोरा नरि बुढा रहेका छन्।

घटना वैशाख ३ गते बेलुका भएको हो। कर्णालीपारि सुर्खेत जिल्लाको पञ्चपुरी नगरपालिका–७ मा रहेको वन क्षेत्रमा घाँस काटेर फर्किने क्रममा एक्कासि डुंगा पल्टिँदा चालकसमेत रहेका बुबा र सवार छोरा नदीमा बेपत्ता भएका हुन्। स्थानीयका अनुसार नदीको बहाव तीव्र रहेकाले दुर्घटना भएको अनुमान गरिएको छ।

दुर्घटनापछि तत्कालै उद्धार तथा खोजी कार्य सुरु गरिएको छ। अस्थायी प्रहरी सुरक्षा बेस माथिल्लो कर्णाली, प्रहरी चौकी भैरवस्थान, ढुंगाचाल्ना र ढकारीबाट प्रहरी टोली खटिएको छ। साथै, सशस्त्र प्रहरी बलको विपद् उद्धार तालिमप्राप्त विशेष टोली पनि घटनास्थलतर्फ परिचालन गरिएको जिल्ला प्रहरी कार्यालय अछामका प्रमुख प्रहरी नायब उपरीक्षक ओमप्रकाश खनालले जानकारी दिएका छन्।

हालसम्म बेपत्ता दुवै जनाको अवस्था अज्ञात रहेको छ भने खोजी कार्य तीव्र बनाइएको प्रहरीले जनाएको छ। नदीको तीव्र बहाव, भौगोलिक कठिनाइ र साँझपखको समयका कारण उद्धार कार्य चुनौतीपूर्ण बनेको बताइएको छ।

स्थानीय बासिन्दाहरू पनि प्रहरीसँगै खोजीमा सहयोग गरिरहेका छन्। प्रशासनले सम्भावित स्थानहरूमा व्यापक खोजी गरिरहेको र आवश्यक परे थप उद्धार टोली परिचालन गरिने जनाएको छ।