३० बैशाख २०८३, बुधबार १०:४१ बुधवार साप्ताहिक, नयाँबानेश्वर, काठमाण्डौं

ट्राफिक नियम तोड्ने चालक धमाधम कारबाहीमा

काठमाडौं । काठमाडौँ  उपत्यका ट्राफिक प्रहरी कार्यालयले बितेका २४ घण्टामा सवारी नियम उल्लङ्घन गर्ने १ हजार ६८७ जना चालकलाई कारबाही गरेको जनाएको छ।

कार्यालयका अनुसार उक्त कारबाहीबाट राज्यकोषमा रु २० लाख ३१ हजार ५०६ राजस्व दाखिला भएको छ। ट्राफिक प्रहरीले उपत्यकाका विभिन्न स्थानमा विशेष निगरानी तथा चेकजाँच अभियान सञ्चालन गरेको जनाएको छ।

कारबाहीमा परेकामध्ये मादक पदार्थ सेवन गरेर सवारी चलाउने ८५ जना रहेका छन् भने नियमविपरीत ‘राइड सेयरिङ’ गर्ने १६३ जनालाई पनि कारबाही गरिएको छ। त्यसैगरी ट्राफिक सङ्केत बत्ती उल्लङ्घन गर्ने १४२ तथा तीव्र गतिमा सवारी चलाउने ११७ चालकलाई नियन्त्रणमा लिइएको प्रहरीले जनाएको छ।

यस्तै, ‘लेन’ अनुशासन पालना नगर्ने ६६, निषेधित क्षेत्रमा हर्न बजाउने ८६, सडक पेटीमा पार्किङ गर्ने ९८, एकतर्फी सडकमा सवारी चलाउने १२१ तथा अन्य विभिन्न नियम उल्लङ्घन गर्ने ८०४ जनालाई कारबाही गरिएको छ।

ट्राफिक प्रहरीले सवारी चालकलाई नियम पालना गर्न आग्रह गर्दै दुर्घटना न्यूनीकरणका लागि नियमित अनुगमन र कारबाहीलाई थप कडाइ गरिने जनाएको छ।