१२ श्रावण २०७८, मंगलवार १०:४५ बुधवार साप्ताहिक, नयाँबानेश्वर, काठमाण्डौं

पार्टी एकताको कुरा चलिरहन्छ, सरकारमा सहभागी हुन्छौँ – माधव नेपाल

१२ साउन, काठमाण्डौ । नेकपा एमालेका वरिष्ठ नेता माधवकुमार नेपालले पाँच दलीय गठबन्धनको सरकारमा सहभागी हुने बताएका छन्। नेकपा माओवादी केन्द्रका अध्यक्ष पुष्पकमल दाहालसँग मंगलबार बिहान भएको भेटमा नेपालले यस्तो बताएका हुन्।

अध्यक्ष दाहालले पेरिसडाँडामा बसेकव पार्टी स्थायी कमिटी बैठकका क्रममा बोल्दै नेता नेपालले सरकारमा सहभागी हुने बताएको जानकारी दिएका छन्। उनले बैठकमा नेता नेपालको भागमा एकजना प्रदेश प्रमुख र एकजना योजना आयोग सदस्य पनि छुट्याइएको बताए।

शेरबहादुर देउवा नेतृत्वको सरकारले सातै प्रदेश प्रमुख फेर्ने तयारी गरिरहेका बेला प्रचण्डले नेपाललाई भेटेका थिए। माधवजीले पार्टीमा एकताको कुरा चलिरहन्छ, तर हामी सरकारमा सहभागी हुन्छौँ भन्नुभएको छु, बैठकमा बोल्दै दाहालले भने, प्रदेश प्रमुख र योजना आयोग सदस्यको पनि हामी नाम दिन्छौँ। सरकारमा सहभागिताबारे साथीहरुसँग सल्लाह भइरहेको छ।

उता हिजो मात्रै बसेको माधव पक्षीय नेताहरुको स्थायी कमिटी बैठकले एमालेमा चलिरहेको एकतालाई नै अघि बढाउने निर्णय लिएको थियो। नेता रघुजी पन्तले बैठकबाट एमालेमै रहने निर्णय भएको बताउँदै त्यसका लागि छलफल तीव्र बनाउने निर्णय भएको उल्लेख गरेका थिए।

यसैबीच माओवादी केन्द्रको स्थायी कमिटी बैठक पेरिसडाँडामा बसेको छ। बैठकमा आफ्नो भागमा परेको प्रदेश प्रमुखसहितका पदमा पठाउने व्यक्ति र मन्त्रिपरिषद् विस्तारबारे कुरा भएको थियो। माओवादीले गण्डकीमा अमिक शेरचनलाई सिफारिस गर्ने भएको छ। उता प्रदेश २ बाट हटाइएका तिलक परियारलाई पनि फेरि सिफारिस गरिएको छ। तर मन्त्रिपरिषद्‍मा पठाउने थप सदस्यबारे भोलि निर्णय लिने तयारी माओवादीले गरेको छ।