२ भाद्र २०७८, बुधबार ०९:५९ बुधवार साप्ताहिक, नयाँबानेश्वर, काठमाण्डौं

माधव नेपालको पार्टीको नाम ‘एमाले समाजवादी’, चुनाव चिन्ह ‘खुला किताब’

२ भदौं ,काठमाडौं । नेकपा एमालेका वरिष्ठ नेता माधवकुमार नेपाल पक्षले नयाँ पार्टीको नाम ‘एमाले समाजवादी’ राख्ने भएको छ । नेपाल पक्षको केन्द्रीय कमिटी बैठकले पार्टीको नाम र चुनाव चिन्ह टुङ्गो लगाएको हो ।

नेपालको अध्यक्षतामा निर्वाचन आयोगमा दर्ता हुने उक्त पार्टीको चुनाव चिन्ह खुल्ला किताब रहने एक केन्द्रीय सदस्यले जानकारी दिएका छन् । पार्टीको नाम र चुनाव चिन्हबारे विभिन्न विकल्पमा छलफल भए पनि अन्तिममा एमाले समाजवादी राख्ने र खुला किताब चुनाव चिन्ह राख्ने सहमति जुटेको ती नेताले जानकारी दिए ।

नेपाल पक्षले कम्तिमा ६० सदस्यीय कार्यसमिति बनाउने तयारी गरेको छ । पार्टीको नाम, विधान, प्रस्तावना यसअघि नै टुंगो लगाइसकिएको छ । नेपाल समूहको पार्टी दर्ता भएपछि सरकारमा जाने तयारीमा छ । २०५४ सालमा विभाजित भएको एमाले ०५६ मा एक भएको थियो ।

यसपालि एमाले फुटाउँदा नेपाललाई आफ्नै समूहका दोस्रो पुस्ताका नेता कार्यकर्ताले साथ नदिने देखिएको छ । तेस्रो पुस्ताका युवा नेता कार्यकर्ताको समर्थनमा नेपालले नयाँ पार्टी बनाउन लागेका हुन् ।