१६ भाद्र २०७८, बुधबार १४:०५ बुधवार साप्ताहिक, नयाँबानेश्वर, काठमाण्डौं

सभामुख र निर्वाचन आयोगविरुद्ध एमालेद्वारा दायर रिटमा सर्वोच्चले तोक्यो शुक्रबारलाई पेसी

१६ भदौं, काठमाडौं । सभामुख अग्नीप्रसाद सापकोटा र निर्वाचन आयोगविरुद्ध नेकपा एमालेले दायर गरेको रिट सर्वोच्चले दर्ता गरेको छ । रिट दर्तासँगै सर्वोच्चले शुक्रबारलाई पेसी तोकेको छ ।

एमालेले सभामुख अग्नीप्रसाद सापकोटा, निर्वाचन आयोग र लुम्बिनी प्रदेशका सभामुखविरुद्ध सर्वोच्च अदालत पुगेको छ । एमालेले माधवकुमार नेपालसहित १४ सांसदलाई कारबाही गरी संसद् सचिवालयमा बुझाएको थियो । तर, सभामुख सापकोटाले सांसदहरूलाई पदमुक्त गर्ने निर्णय नगरेको भन्दै एमाले अदालत गएको हो ।

सभामुख सापकोटाविरुद्धको रिटमा तत्कालीन एमालेका १४ सांसदलाई पनि विपक्षी बनाइएको छ । निर्वाचन आयोगले कारबाहीमा परेका एमालेका १४ सांसदसहितका आधारमा नेकपा (एकीकृत समाजवादी) दर्ता गरेको थियो । उक्त निर्णय विवादास्पद भएको एमालेको ठहर छ ।

त्यस्तै, लुम्बिनी प्रदेशका सभामुख पूर्णबहादुर घर्तीले एमालेले कारबाही गरेको लुम्बिनीका सांसदलाई पदमुक्त नगरेको भन्दै एमालेले रिट हालेको हो ।