१९ भाद्र २०७८, शनिबार १२:०४ बुधवार साप्ताहिक, नयाँबानेश्वर, काठमाण्डौं

देउवा र प्रचण्डलाई ओलीको प्रश्न : एमसीसी के गर्ने ?

१९ भदौं ,काठमाडौं । नेकपा एमालेका अध्यक्ष केपी ओलीले प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ लाई प्रश्नैप्रश्न बर्षाएका छन् ।

आज (शनिबार) नेकपा एमालेको काठमाडौं महानगरपालिकास्तरीय कार्यक्रममा ओलीले अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) सम्झौताबारे के गर्ने भन्दै जवाफ मागेका छन् । एमसीसी झुक्याएर पारित गर्न खोजेको आरोप लगाउँदै ओलीले भने, ‘एमसीसीबारे कोही बोल्दैनन्, के गर्ने हो भन्दैनन्, शेरबहादुर देउवाले भन्नु पर्दैन एमसीसी के गर्ने ?, प्रचण्डजीले बोल्नु पर्दैन एमसीसी के गर्ने ? उहाँहरु चुपचाप छन् ।

ओलीले उत्तरी छिमेकी चीनसँग सीमा विवाद नरहेको भन्दै कसलाई खुशी पार्न चीनसँग सीमा विवाद समाधान गर्न समिति बनाएको भन्ने प्रश्न गरे । पार्टीका पूर्वनेता माधव नेपालप्रति क्रुद्ध देखिएका ओलीले भने, ‘दुनियाँ देश गएँ, तर माधव नेपाल जस्तो लाजशरम पचेको मान्छे कतै देखिनँ ।

वामपन्थी सरकार ढालेर, विकासको काम गरिरहेको सरकार ढालेर क्रान्तिका कुरा गरेको भन्दै उनले नेपालको आलोचना गरेका हुन् । उनले आफूले जस्तो अरुले विकास गर्न नसक्ने दावी गर्दै अब मेलम्चीको पानी ल्याउन पनि एमाले कै सरकार चाहिने जिकिर पनि गरे । अहिलेको सरकारले ल्याउन नसक्ने ठोकुवा गरे ।