३० भाद्र २०७८, बुधबार १०:३५ बुधवार साप्ताहिक, नयाँबानेश्वर, काठमाण्डौं

एमालेकाे आरोप : भदौ ३० भित्रै बजेट पारित गर्नुपर्नेमा सरकार गैरजिम्मेवार बन्यो

३० भदौं, काठमाडौं । प्रमुख प्रतिपक्षी नेकपा एमालेले वर्तमान सरकारकै कारण वित्तीय संकटको परिस्थिति सिर्जना भएको आरोप लगाएको छ । आर्थिक वर्ष शुरु भएर लामो समय गुज्रिसक्दा पनि प्रतिस्थापन विधेयकको तयारीका नाममा सरकारले अनावश्यक समय गुजारेकै कारण वित्तीय संकटको परिस्थिति सिर्जना भएको निष्कर्ष निकालेको हो ।

एमालेले बुधबार एक विज्ञप्ति जारी गर्दै लामो तयारीपछि ल्याइएको प्रतिस्थापन विधेयकले बजेटरी सिद्धान्त र वित्तीय अनुशासनलाई समेत उल्लंघन गरेको जनाएको छ । विज्ञप्तिमा भनिएको छ, ‘सरकारले अनिवार्य दायित्वभित्र पर्ने वित्त व्यवस्थापनको बजेट कटौती गर्ने गैरजिम्मेवार काम गरेको छ । नेकपा (एमाले) बजेट जस्तो संवेदनशील विषयमा सरकारको उदासीनता र गैरजिम्मेवार रवैयाप्रति खेद व्यक्त गर्दछ । प्रमुख प्रतिपक्षीका जायज मागलाई सम्बोधन गरी प्रतिनिधिसभालाई सुचारु गर्न सरकार र प्रतिनिधिसभाका सभामुखको ध्यानाकर्षण गर्दछ ।

एमालेले सरकारले प्रतिपक्षको अवरोधका कारणले बजेट समयमा पारित नभएको जस्तो गरी भ्रम सिर्जना गरिरहेको समेत बताएको छ । विज्ञप्तिमा भनिएको छ, ‘समाभुख र सरकारको तर्फबाट प्रतिपक्षको सहमति विना नै संसदको काम कारवाही अघि बढाउने काम भइरहेको छ । आफूलाई इच्छा लागेको बिजनेश स्वेच्छाचारी ढंगले अघि बढाउने सरकारले भदौ ३० भित्र बजेट पारित गरिसक्नु पर्ने विषय बिर्सेझैं हाउस असोज ४ गते किन सारियो यसको जवाफ यो गैरजिम्मवार सरकारले दिनुपर्छ । यो, नभएका काम जति सबैको दोष प्रतिपक्षमाथि थोपर्न खोज्ने सुतुरमुर्ग चाल मात्र हो । सरकारको यसप्रकारको रवैयाप्रति हाम्रो पार्टी नेकपा एमाले खेद व्यक्त गर्दछ ।