१० मंसिर २०७८, शुक्रबार ०५:२४ बुधवार साप्ताहिक, नयाँबानेश्वर, काठमाण्डौं

एमाले निर्वाचनमा उम्मेदवारलाई कडाइ, ठूला प्रचार सामाग्री प्रयोग गर्न नपाइने

१० मंसिर, चितवन । नेकपा एमालेले नयाँ नेतृत्वका आकांक्षीहरुलाई प्रचारप्रसारका लागि नयाँ मापदण्ड जारी गरेको छ । एमाले केन्द्रीय निर्वाचन आयोगले उम्मेद्वारलाई २ वाई ४ इञ्च साइजको भन्दा ठूलो निर्वाचन सामाग्री प्रयोग नगर्न अपील गरेको छ ।

एमाले केन्द्रीय निर्वाचन आयोगका अध्यक्ष डा. विजय सुब्बाले ठूला प्रचारप्रसार सामाग्री प्रयोग गरेको पाइए उम्मेदवारीनै खारेजसम्मको कारवाही गरिने बताएका छन् । उनका अनुसार तुल, व्यानरहरु समेत मतदानस्थल आसपासमा राख्न पाइने छैन ।

महाधिवेशनको बन्दसत्र सौराहाको हेटल सेभेन स्टारमा ११ गते विहान ८ बजेदेखि सुरु हुँदैछ । ‘प्रचारप्रसारका सामाग्रीलाई निरुत्साहित गरेका छौं, आचारसंहिता जारी भइसकेको छ, उनले भने, सबै उम्मेदवारले अनावश्यक प्रचारप्रसारका सामाग्री प्रयोग नगर्ने अपेक्षा गरेका छौं ।

उम्मेदवारले प्रचारका लागि पर्चा, पम्प्लेट, ब्यानरजस्ता सामग्री वितरण गर्न रोक लगाइएको छ । प्यानल बनाएर भोट मागेको भेटिए पनि कारवाही हुने निर्वाचन आयोगले जनाएको छ । मतदानका लागि ९२ वटा भोटिङ मेसिनहरु मध्ये ५-७ वटा बाहेक सबै प्रयोगमा ल्याइने बताए । हामी विद्युतीय मतदान गर्ने भएकाले मतदान सकिएको ४ घण्टामै नतिजा सार्वजनिक हुनेछ, उनले भने, मतदाताई मतदान गर्न करिब आधा घण्टा लाग्नेछ । उम्मेदवारको अन्तिम नामावली शनिबार बेलुका ६ बजे प्रकाशन गर्ने तयारी छ ।

५० वटा क्षेत्रमा चुनाव हुनेछ । १५ जना पदाधिकारी सहित २ सय २५ जनाको केन्द्रीय कमिटी बन्नेछ । केन्द्रीय अनुशासन आयोगमा १५ र केन्द्रीय लेखा आयोगमा १५ गरी ३० जना निर्वाचित हुनेछन् । अलमल नहोस् भनेर मतदानस्थल कार्यालय नमूना मतदानका लागि ३ मेसीन राख्दैछौं, उनले भने, नमूना मतपत्र पनि बाँडिनेछ ।

विद्युतीय मतदान गर्दा मतदाताले ५० पटक स्क्रोल गर्नुपर्नेछ । १२ गते विहान ८ बजेदेखि ५ बजेसम्म मतदान हुनेछ । निर्वाचन आयोगले महाधिवेशन प्रतिनिधिहरुलाई मोबाइलमै उम्मेदवारको विवरण उपलब्ध गराउने तयारी गरेको छ ।

१२ गते बिहानसम्म उम्मेदवारको तस्बिर, क्रम नम्बर र नामसहितको प्रकाशित प्रति प्रतिनिधिको हातहातमा पु¥याइने योजना छ ।