६ फाल्गुन २०७८, शुक्रबार १३:१७ बुधवार साप्ताहिक, नयाँबानेश्वर, काठमाण्डौं

एमसीसीबारे अमेरिकाले भन्यो- विरोधका नाममा हिंसात्मक गतिविधि स्वीकार्य हुँदैन

६ फागुन,काठमाडौं । अमेरिकी सहयोग परियोजना एमसीसी अनुमोदनका लागि दबाब दिंदै आएको अमेरिकाले विरोधका नाममा हुने हिंसात्मक गतिविधि स्वीकार्य नहुने बताएको छ ।

नेपालमा एमसीसीविरुद्ध हिंसात्मक प्रदर्शन हुन थालेपछि काठमाडौंस्थित अमेरिकी राजदूत र्‍यान्डी बेरीले हिंसालाई उक्साउने गतिविधि कदापी नस्वीकार्ने बताएका छन् । उनले अमेरिका स्वतन्त्र अभिव्यक्त र सार्वजनिक बहसको बलियो समर्थक रहेको भन्दै शान्तिपूर्णरूपमा आफ्नो विचार प्रकट गर्न आग्रह गरेका छन्।

हामी वाक स्वतन्त्रता र तथ्यमा आधारित खुला बहसको बलियो समर्थक हौं । एमसीसीको विषयमा पनि हाम्रो धारणा त्यही हो । आफ्नो विचार व्यक्त गर्न पाउनु लोकतन्त्रको अन्तरनिहीत विषयवस्तु हो र सबैलाई आफ्नो धारणा शान्तिपूर्वक राख्न छुट हुनुपर्छ । तर हिंसा या हिंसा भड्काउने किसिमका विचारहरू स्वीकार्य हुँदैनन्, उनले सामाजिक सञ्जालमार्फत् भनेका छन् ।

एमसीसी संसदमा टेबल गर्ने कुराले जति राजनीतिक दलहरुबीच असझदारी रहेको छ । त्योभन्दा धेरै अहिले एमसीसीका नाममा दिनहुँ प्रदर्शन भइरहेका छन् । यहाँसम्म कि बम आतंक समेच मच्चाइएको छ । त्यही भएर अमेरिकाले यस्तो धारणा सार्वजनिक गरेको बताइएको छ ।