७ फाल्गुन २०७८, शनिबार ०८:५८ बुधवार साप्ताहिक, नयाँबानेश्वर, काठमाण्डौं

नयाँ पार्टी घोषणा गर्दै कमल थापाले भने, ‘गीताको कसम खाएका कारण राप्रपा फुटाइँन’

७ फागुन, काठमाडौं । राप्रपा नेपालका अध्यक्ष कमल थापाले आफूले चाहेको भए सक्ने भए पनि राप्रपा नफुटाएको बताएका छन् । आफ्नो नयाँ पार्टीको घोषणा सभालाई सम्बोधन गर्दै थापाले आफूलाई विधान र कानुनअनुसार राप्रपा फुटाउने सुझाव आए पनि गीतामा हात राखेर नफुटाउने कसम खाएको कारण त्यसो नगरेको बताएका छन् ।

कार्यक्रममा उनले भने, मलाई आज २०७६ साल फागुन २९ गतेको सम्झना भइराखेको छ । यही मञ्चबाट गीता हातमा लिएर राप्रपालाई कदापि फुट्न दिन छैन भन्ने कसम खाएको थिएँ । गीता सनातन धर्मावलम्बीहरूको एउटा महान् ग्रन्थ हो । त्यसलाई छोएर मैले राप्रपा कहिले फुटाउँदिन भनेको मलाई सम्झना छ । मलाई आज यो भन्दा खुशी लाग्छ कि मैले राप्रपा फुटाइँन ।

मैले चाहेको भए सजिलै सक्थें । अहिले पनि राप्रपामा हामीप्रति स्नेह राख्ने बहुसंख्यक केन्द्रीय सदस्यहरू हुनुहुन्छ । वहाँहरूले विधान र कानुन बमोजिम बहुमत पुर्‍याएर पार्टी फुटाऔं भन्ने सल्लाह दिनुभएको थियो । तर मैले पार्टी फुटाउन चाहिनँ, उनले थपे, पार्टी फुटाएर बलियो पार्टी बन्छ भन्ने कुरामा म विश्वास राख्दिनँ ।’

अध्यक्ष कमल थापाले राजसंस्थाले अभिभावकको भूमिका निर्वाह गर्न नसकेको आरोप लगाएका छन् । थापाले राजसंस्थाले गुट बोकेर हिंडेको र अभिभावकत्वको भूमिका निर्वाह गर्न नसकेको बताएका हुन् । उनले भने, राप्रपाको आन्तरिक मामिलामा राजसंस्थाबाट हस्तक्षेप भयो। राप्रपाले परिकल्पना गरेको राजसंस्थाले आदर्श अभिभावकको भूमिका निर्वाह गर्न सकेन । उनले पछिल्लो पाँच वर्षमा आफूबाट धेरै गल्तीहरु भएको स्वीकार्दै माफी दिन आग्रह गरे ।