७ फाल्गुन २०७८, शनिबार १०:२७ बुधवार साप्ताहिक, नयाँबानेश्वर, काठमाण्डौं

गठबन्धनलाई पानीमुनि गए पनि ठेगान लगाइन्छ : ओली

७ फागुन, काठमाडौं । प्रमुख प्रतिपक्षी दल नेकपा एमालेका अध्यक्ष एवं पूर्व प्रधानमन्त्री केपी शर्मा ओलीले अहिलेको सत्ता गठबन्धनलाई पानीमुनि गए पनि ठेगान लगाउने चेतावनी दिएका छन् ।

अध्यक्ष ओलीले गठबन्धनको आयु बढीमा एक वर्ष रहेको समेत दावी गरेका छन् । शनिबार राजधानीमा आयोजित एक कार्यक्रमलाई सम्बोधन गर्दै अध्यक्ष ओलीले एमाले चुनाव जित्नका लागि सरकारमा जाने नभई जनताको काम गर्न जान चाहेको बताए ।

रामलाई षड्यन्त्र गरेर १४ वर्ष वनवास पठाएको स्मरण गर्दै उनले भने, नेपालमा यतिधेरै मन्थरा र सकुनीहरु छन्, उनीहरुले हामीविरुद्ध षड्यन्त्र गरिरहेका छन् । गठबन्धनले जे काम गर्दा पनि झुक्याएर गरेको बताउँदै ओलीले संसदबाट नसकेर सर्वोच्चबाट सरकार बनाएको टिप्पणी गरे । उनले भने, अब सर्वोच्च अदालतले होइन, जन अदालतले फैसला गर्छ त्यसको तयारी गर्नुस् ।’

उनले शिक्षक, कर्मचारीलाई निष्पक्ष भएर काम गर्न आग्रह गर्दै उनले नेकपा एमालेले प्रशासनको बलमा नभई जनताको मतले चुनाव जित्ने दाबी गरे । उनले भने, प्रशासनसँग एउटै आग्रह छ, तपाईहरु निष्पक्ष रहनुस् । उनले भने, जनताले एमालेमाथि विश्वास गरेको छ, हामीले मतदाता किन्दैनौ, अनावश्यक खर्च गर्दैनौं ।