१४ बैशाख २०७९, बुधबार ०८:५२ बुधवार साप्ताहिक, नयाँबानेश्वर, काठमाण्डौं

गठबन्धन बालुवा र तासको घर हो, तर्सिनु पर्दैन : विष्णु पौडेल

१४ वैशाख, रुपन्देही । प्रमुख प्रतिपक्षी दल नेकपा एमाले का उपाध्यक्ष विष्णु पौडेलले अहिलेको सत्ता गठबन्धन बालुवा र तासको घर भएकाले तर्सनु पर्ने अवस्था नरहेको बताएका छन् ।

बुधबार रुपन्देहीको तिलोत्तमा नगरपालिकामा आयोजित उम्मेदवार अभिमुखीकरण तथा अगुवा कार्यकर्ता भेलालाई सम्बोधन गर्दै पौडेलले बालुवा र तासको घर जस्तै रहेको गठबन्धन एमालेका लागि चुनौती हुन नसक्ने जिकिर गरे । गठबन्धनसँग तर्सनु नपर्ने उनको भनाइ छ ।

निर्वाचनमा पराजय हुने स्वीकार गरेर गठबन्धन बनाइएको उनले आरोप लगाए । एमालेले जित्दा मुलुकको समृद्धि र विकास अघि बढ्ने भएकाले जनताका लागि जित हासिल गर्नुपर्ने धारणा राखे । सरकारमा रहेका दलहरू आजका मितिमा पनि निर्वाचन सार्ने षड्यन्त्रमा लागिरहेको उनको आरोप छ । उनले जतिसुकै कोशिस गरे पनि समयमा नै निर्वाचन गर्न र एमालेलाई विजयी हुनबाट कसैले रोक्न नसक्ने दाबी गरे ।

पौडेलले स्थानीय तहमा जितको शुरुवात गर्दै प्रदेश र केन्द्रको निर्वाचनमा विजयी हुँदै एमालेको एकल नेतृत्वको सरकार गठन हुने जिकिर पनि गरे । उनले तिलोत्तमा नगरपालिकाका १७ वटै वडामा एमालेले शानदार विजयी हासिल गर्ने दाबी गरेका छन् ।