१९ असार २०७९, आईतवार १३:०४ बुधवार साप्ताहिक, नयाँबानेश्वर, काठमाण्डौं

चुनावी अन्तरघात छानविन गर्न एमालेले बनायो समिति

१९ असार, काठमाडौँ । प्रमुख प्रतिपक्षी दल रण्नेकपा (एमाले) ले स्थानीय तह निर्वाचनमा अनुशासनहीनता र अराजकताले पार्टी हारेको निष्कर्ष निकालेको छ । आज बसेको सचिवालय बैठकले अन्तरघातका कारण परिणाम अनुकूल नआएको निष्कर्ष निकालेको हो ।

बैठकले अन्तरघात छानविन गरेर दोषी देखिएकालाई कारबाही गर्न उपाध्यक्ष विष्णु पौडेलेको नेतृत्वमा समिति गठन गरेको प्रचार विभाग प्रमुख पृथ्बीसुब्बा गुरुङले जानकारी दिए ।

आन्तरिक समस्याहरू थिए, पार्टीभित्र जुन खालका अराजकता र अनुशासनहीनता देखिए त्यसले परिणामलाई हाम्रो अनुकूल हुन दिएन, निणर्य सुनाउँदै गुरुङले भने, आगामी दिनमा यो अनुशासनहीनता र अराजकताको अन्त्य गरेर चुस्त दुरुस्त निर्वाचनमा जाने निणर्य गरेको छ ।

उनकाअनुसार समितिले छानबिन गरेर कारबाही गर्ने छ । चुनावमा अन्तरघात गर्नेहरूउपर उजुरीहरू परेका छन् । ती उजुरी छानबिन र कारबाहीका लागि उपाध्यक्ष विष्णु पौडेलको नेतृत्वमा छानबिन र कारबाही समिति गठन भएको छ, गुरुङले भने, यो समितिले प्रतिवेदन तयार पार्नेछ र आफै कारबाही गर्न सक्ने छ । समितिमा केन्द्रीय निर्वाचन विभाग र संगठन विभागका प्रमुखहरू रहने उनले बताए ।