५ श्रावण २०७९, बिहीबार ०२:३१ बुधवार साप्ताहिक, नयाँबानेश्वर, काठमाण्डौं

छानबिन समितिले आज पूर्व अर्थमन्त्री शर्मासँग छलफल गर्ने

५ साउन, काठमाडौं । काठमाडौं । पूर्व अर्थमन्त्री जनार्दन शर्मामाथि छानबिनका लागि गठित संसदीय विशेष छानबिन समितिले आज शर्मासँग छलफल गर्ने भएको छ ।

हिजो अर्थ मन्त्रालयमा बजेट निर्माणका क्रममा अनधिकृत व्यक्तिको प्रवेशका बारेमा समाचार लेख्ने दुई पत्रकारसँग छलफल गरेको समितिले आज शर्मासँग छलफल गर्न लागेको हो । बजेट निर्माणमा अनधिकृत व्यक्तिलाई प्रवेश गराएको आरोप लागेका पूर्व अर्थमन्त्री जनार्दन शर्मामाथि छानबिन गर्न बनेको संसदीय छानबिन समितिले आज उनीसँग छलफल गर्ने भएको हो ।

तत्कालीन अर्थमन्त्री शर्माले २०७९/०८० को बजेट बनाउने क्रममा अनाधिकृत व्यक्तिलाई मध्यरातमा अर्थ मन्त्रालय बोलाएर करको दर हेरफेर गरेको आरोप लागेको छ । उक्त आरोपबार छानबिन गर्न ११ सदस्यीय संसदीय विशेष छानबिन समिति गठन भएको थियो । पूर्व अर्थमन्त्री शर्माले संसदीय छानबिन समिति बनेसँगै अर्थमन्त्रीबाट राजीनामा दिएका थिए ।

आज समिति गठन गरिएको १० दिन पूरा भएको छ । समितिले छानबिनका लागि समय अपुग भएको भन्दै सात दिन म्याद थप गर्नका लागि सभामुख अग्नीप्रसाद सापकोटासँग आग्रह गर्ने तयारी गरेको छ ।