११ फाल्गुन २०७९, बिहीबार ११:५९ बुधवार साप्ताहिक, नयाँबानेश्वर, काठमाण्डौं

उपत्यकामा प्रतिघण्टा ५० किलोमिटर बढीको गतिमा गाडी–बाइक गुडाउन नपाइने

११ फागुन, काठमाडौँ । काठमाडौँ उपत्यकामा अब प्रतिघण्टा ५० किलोमिटर भन्दा बढीको गतिमा गाडी–मोटरसाइकल (बाइक) गुडाउन नपाइने भएको छ ।
उपत्यका ट्राफिक प्रहरी कार्यालयले सूचना निकालेर सवारी तथा यातायात व्यवस्था ऐन र सडकको भौतिक अवस्था समेतलाई ध्यान दिएर गाडी तथा मोटरसाइकलको अधिकतम गति प्रतिघण्टा ५० किलोमिटर तोकिएको जानकारी गराएको छ ।
कलङ्की–कोटेश्वर सडक खण्डको फास्ट ट्रयाकमा ५० किलोमिटर र सर्भिस ट्रयाकमा २० किलोमिटर गति तोकिएको छ । यस्तै कोटेश्वर–भक्तपुर सडक खण्डमा पनि प्रतिघण्टा ५० किलोमिटर गति तोकिएको छ ।

उपत्यकाको विभिन्न स्थानमा आवश्यकता अनुसार गति सीमा तोकी सोही स्थानमा गति सीमाका बोर्डहरू समेत राखिएको ट्राफिक प्रहरीले जनाएको छ । तोकिएको गतिभन्दा बढीमा सवारी चलाउनेलाई ट्राफिक प्रहरीले जरिवाना गर्दै आएको छ ।