३ चैत्र २०७९, शुक्रबार ०८:५७ बुधवार साप्ताहिक, नयाँबानेश्वर, काठमाण्डौं

मतदानपछि ओलीको प्रतिक्रिया : यो डेमोक्रेटिक सिस्टम होइन, साँठगाँठवाला सिस्टम हो

३ चैत,काठमाडौँ । नेकपा (एमाले) एवं पूर्व प्रधानमन्त्री केपी शर्मा ओलीले उपराष्ट्रपति पदको निर्वाचनमा मतदान गरेका छन् । नयाँ बानेश्वरस्थित संघीय संसद् भवनमा रहेको मतदान केन्द्रबाट उनले मतदान गरेका हुन् । उपराष्ट्रपति निर्वाचनअन्तर्गत आज बिहान १० बजेदेखि मतदान जारी छ ।

संसद भवन नयाँबानेश्वरमा जारी मतदानपछि उनले पत्रकारहरुसँग संक्षिप्त कुराकानी गरेका छन् । संसद भवनबाट बाहिरिने क्रममा सत्ता गठबन्धनतिर लक्षित गर्दै साँठगाँठमा रमाएको बताए । यो डेमोक्रेटिक सिस्टम होइन, साँठगाँठवाला सिस्टम हो, उनले भने, साँठगाँठ गरेर अघि बढेका छन् ।

उनले केन्द्रबाट प्रदेशसम्म सत्ता गए पनि आफूहरुलाई फरक नपर्ने बताए । सत्ता गएर के हुन्छ, हामी प्रतिपक्षमा बस्छौँ, उनले भने, प्रतिपक्षमा बस्दैमा राजनीति सकिने होइन, अमेरिकामा पनि रिपब्लिकन पार्टी प्रतिपक्षमा बसेकै हो, उसको राजनीति सकिएको छैन ।

उनले संक्रमणकालीन न्यायसम्बन्धी व्यवस्थाको कानुनबारे आफूहरुले संसदमा स्पष्ट बोल्ने बताए । टीआरसीबारे हामी संसदमा स्पष्ट रुपमा बोल्छौँ, उनले भने, टुंग्याउनुपर्छ तर राम्रो गरेर ।