२३ चैत्र २०७९, बिहीबार ०१:३१ बुधवार साप्ताहिक, नयाँबानेश्वर, काठमाण्डौं

उपनिर्वाचन : उम्मेदवारको अन्तिम नामावली प्रकाशित हुँदै

२३ चैत, काठमाडौं । उपनिर्वाचन निर्वाचन कार्यतालिका अनुसार आज उम्मेदवारले आफ्नो उम्मेदवारी फिर्ता लिन सक्ने निर्वाचन आयोगले जनाएको छ । आयोगका अनुसार बिहान ९ बजेदेखि दिउँसो १ बजेसम्म उम्मेदवारी फिर्ता लिने समय रहेको छ ।

आयोगले आजै उम्मेदवारको अन्तिम नामावली प्रकाशन गरिने जनाएको छ । चितवन–२, तनहुँ–१ र बारा–२ मा हुन लागेको उपनिर्वाचनमा क्रमशः २४ जना, ९ जना र ३६ जना गरी ६९ जनाले उम्मेदवारी दिएका छन् । तनहुँ–१ का प्रतिनिधि सभा सदस्य रामचन्द्र पौडेल राष्ट्रपति र बारा–२ का रामसहायप्रसाद यादव उपराष्ट्रपति निर्वाचित भएपछि उपनिर्वाचन हुन लागेको हो ।

यता, चितवन–२ का प्रतिनिधि सभा सदस्य रवि लामिछानेको नागरिकता विवादमा सांसद पद खारेज भएपछि उपनिर्वाचन हुन लागेको हो । लामिछानेले पुनः चितवन–२ बाटै उम्मेदवारी दिएका छन् । उपनिर्वाचनको लागि आउँदो बैशाख १० गते बिहान ७ बजेदेखि साँझ ५ बजेसम्म मतदान हुनेछ ।