२७ चैत्र २०७९, सोमबार ०६:२१ बुधवार साप्ताहिक, नयाँबानेश्वर, काठमाण्डौं

युवा संघ नेपालको नवौँ महाधिवेशन उद्घाटन गर्न ओली नेपालगञ्जमा

२७ चैत, नेपालगञ्ज । नेकपा एमालेको भातृ संगठन राष्ट्रिय युवा संघ नेपालको नवौँ महाधिवेशन आजबाट सुरु हुने भएको छ । महाधिवेशनको उद्घाटन गर्न सोमबार बिहान एमालेका अध्यक्ष केपी शर्मा ओली नेपालगञ्ज पुगेका छन् । अध्यक्ष ओलीलाई कार्यकर्ताको ठूलो भीडले स्वागत गरेको छ ।

पूर्व प्रधानमन्त्री ओलीसँगै उपाध्यक्ष विष्णु पौडेल, जनसंगठन समन्वय संयन्त्रका संयोजक भानुभक्त ढकाल पनि नेपालगन्ज पुगेका छन् । राष्ट्रिय युवा संघ नेपालका इञ्चार्ज महेश बस्नेत लगायतका नेताहरु यस अगाडि नै नेपालगञ्ज पुगेका छन् ।

आजदेखि चैत २९ गतेसम्म चल्ने महाधिवेशनले नयाँ नेतृत्व चयन गर्दैछ । महाधिवेशनले युवाका वर्तमान मुद्दा र राजनीतिप्रति युवाको निराशालाई समेत सम्बोधन गर्ने युवा संघले जनाएको छ । अध्यक्षका लागि हाल क्षितिव थेवे, सन्तोष रावल र अञ्जना अधिकारीलगायत लबिङमा छन् ।