४ बैशाख २०८०, सोमबार ०२:०६ बुधवार साप्ताहिक, नयाँबानेश्वर, काठमाण्डौं

ओलीलाई भेट्न प्रचण्ड–देउवा बालकोटमा जाँदै

४ वैशाख, काठमाडौँ । प्रधानमन्त्री पुष्पकमल दाहाल ‘प्रचण्ड’ नेकपा एमालेका अध्यक्ष केपी शर्मा ओलीलाई भेट्न आज (सोमबार) बालकोट जाँदैछन् । भाइरल ज्वरोका कारण अस्वस्थ भएर आराम गरिरहेका ओलीलाई भेट्न प्रचण्ड बालकोटस्थित ओली निवास जान लागेका हुन् ।

सत्ता साझेदार दल र प्रमुख प्रतिपक्षी दलका शीर्ष नेताबीच बेपत्ता छानबिन तथा सत्य निरुपणसहित संसद्मा रहेका विधेयकलाई सहमतिमा अघि बढाउने विषयमा आज (सोमबार) छलफल हुँदैछ । प्रधानमन्त्री एवं नेपाल माओवादी केन्द्रका अध्यक्ष पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा र नेपाल कम्युनिस्ट पार्टी (एमाले) का अध्यक्ष केपी शर्मा ओलीबीच विधेयकमा सहमति जुटाउन छलफल हुन लागेको हो ।

बिहान ९ बजे ओलीनिवास बालकोटमा विधेयक अघि बढाउने समझदारीका लागि छलफल हुन लागेको प्रधानमन्त्रीको सचिवालयले जनाएको छ । विगत केहि दिनदेखि संवैधानिक परिषदसम्बन्धी विधेयक र सत्यनिरूपण तथा मेलमिलाप र वेपत्ता पारिएका नागरिक छानबिन सम्बन्धी विधेयकलाई अगाडि बढाउन शीर्ष नेताहरूबीच छलफल भइरहेको छ ।

संक्रमणकालीन न्यायनिरुपणसम्बन्धी कानुनलाई अन्तिम रुप दिने तयारीका लागि आइतबार बोलाइएको बैठकमा अन्तिम समयमा प्रधानमन्त्री प्रचण्डले बालकोट जान अस्वीकार गरेपछि बैठक स्थगित भएको थियो । दलका शीर्ष नेताहरुबीचको सहमतिअनुसार आइतवार बिहान बालकोटमा बैठक बोलाइएको थियो । तर प्रचण्डले अन्तिम समयमा आफू व्यस्त रहेको भन्दै बालकोट जान अस्वीकार गरेका हुन् ।