१९ बैशाख २०८०, मंगलवार १३:०६ बुधवार साप्ताहिक, नयाँबानेश्वर, काठमाण्डौं

यातायातका उपसचिवसँग १ करोड १५ लाख अवैध सम्पत्ति

१९ बैशाख, काठमाडौं । यातायात व्यवस्था कार्यालयको सुकेधारास्थित सवारी चालक अनुमतिपत्र कार्यालयका उपसचिव सुन्दर भट्टराईविरुद्ध विशेष अदालतमा भ्रष्टाचार मुद्दा परेको छ । अवैध सम्पत्ति कमाएको ठहर गर्दै अख्तियार दुरुपयोग अनुसन्धान आयोगले भट्टराईविरुद्ध आज अदालतमा मुद्दा दायर गरेको हो ।

उनले सरकारी सेवा प्रवेश गरेको २०३८ साउन १ देखि २०७५ मंसिर मसान्तसम्म गरेको आम्दानी र खर्चको हिसाब गर्दा उनको सम्पत्तिमध्ये १ करोड १५ लाख २९ हजार १९३ रूपैयाँको स्रोत नखुलेको अख्तियारको दाबी छ ।

उनको वैध आम्दानी १ करोड ९२ लाख एक हजार ९२२ रहेको तर उनको खर्च ३ करोड ७ लाख ३१ हजार ११६ रुपैयाँ ५ पैसा देखिएको अख्तियारका प्रवक्ता भोला दाहालले जानकारी दिएका छन् । उनीसँग १ करोड १५ लाख २९ हजार १९३ रुपैयाँ ७१ पैसा बिगो माग गरिएको छ ।

भट्टराईले अवैध आर्जनको सम्पत्ति पत्नी मुना अधिकारी भट्टराई र छोरा उत्सुक भट्टराई, छोरी प्रेरिका भट्टराईको नाममा राखेको देखिएको भन्दै उक्त रकम जफत गर्न माग गरेको छ । त्यस्तै आमा इन्दिरा भट्टराईको नाममा राखिएको सम्पत्ति पनि जफत गर्न माग गरिएको अख्तियारले जनाएको छ ।