२५ बैशाख २०८०, सोमबार १४:१० बुधवार साप्ताहिक, नयाँबानेश्वर, काठमाण्डौं

प्रधानन्यायाधीशमा हरिकृष्ण कार्कीलाई नियुक्त गर्न सिफारिस

२५ वैशाख,काठमाडौं । संवैधानिक परिषद्ले प्रधानन्यायाधीशमा हरिकृष्ण कार्कीलाई सिफारिस गरेको छ । आज (सोमबार) बसेको संवैधानिक परिषद वैठकले प्रधानन्यायाधीशमा कार्कीलाई सिफारिस गरेको एक सदस्यले जानकारी दिए । प्रमुख प्रतिपक्षी दल नेकपा एमालेले प्याकेजमा सहमति गर्नु पर्ने अडान राख्दा प्रधानन्यायाधीश नियुक्तिमा सकस परेको थियो । यसअघि बसेको संवैधानिक परिषद्को बैठकमा पनि यसबारे सहमति जुट्न सकेको थिएन ।

संवैधानिक परिषदमा प्रधानन्यायाधीश पनि सदस्य रहन्छन् । तर प्रधानन्यायाधीश नियुक्तिको सिफारिस गर्ने बैठकमा कामु प्रधानन्यायाधीश हरिकृष्ण कार्की भने सहभागी भएनन् । आफैलाई सिफारिस गर्नुपर्ने बैठकमा उनी सहभागी नभएका हुन् ।
संवैधानिक परिषद् सम्बन्धी व्यवस्था संविधानको धारा २८४ मा छ ।

उक्त व्यवस्था अनुसार कानुनमन्त्री भने प्रधानन्यायाधीश सिफारिस गर्ने बैठकमा मात्रै संवैधानिक परिषदको सदस्यका रुपमा सहभागी हुनेछन् । संविधान अनुसार रिक्त हुनु एक महिनापहिले नै नयाँ नियुक्तिका लागि सिफारिस गर्नुपर्ने व्यवस्था संविधानमा छ ।