९ जेष्ठ २०८०, मंगलवार ०१:०३ बुधवार साप्ताहिक, नयाँबानेश्वर, काठमाण्डौं

आईसीसी विश्व कप छनोटका लागि नेपालको प्रारम्भिक टोलीको घोषणा

९ जेठ,काठमाडौँ । आईसीसी विश्व कप छनोटका लागि नेपालको प्रारम्भिक टोलीको घोषणा भएको छ । नेपाल क्रिकेट सङ्घ (क्यान) ले हिजो (सोमबार) जिम्बाब्वेमा हुने छनोटका लागि नेपालको २२ सदस्यीय प्रारम्भिक टोलीको घोषणा गरेको हो ।

प्रारम्भिक टोलीमा कुशल भुर्तेल, आशिफ शेख, ज्ञानेन्द्र मल्ल, कप्तान रोहित पौडेल, कुशल मल्ल, आरिफ शेख, दीपेन्द्र सिंह ऐरी, गुलसन झा, सोमपाल कामी, करण केसी, सन्दीप लामिछाने, भीम सार्की, प्रतिश जिसी, ललित राजवंशी, अर्जुन साउद, सन्दीप जोरा, देव खनाल, किशोर महतो, सूर्य तामाङ, कमल सिंह ऐरी, श्याम ढकाल र अविनास बोहोरा छन् । नेपाली टोलीले आज (मंगलबार) देखि तयारी थाल्दै छ ।

विश्व कप छनोट प्रतियोगितामा १० देशको सहभागिता छ । सहभागी १० टोलीलाई दुई समूहमा विभाजन गरिनेछ । विश्वकप सुपर लिगमा पुछारको पाँचमा रहेका श्रीलङ्का, वेस्ट इण्डिज, जिम्बाब्वे, आयरल्याण्ड र नेदरल्याण्ड्सले विश्वकप छनोटमा स्थान पक्का गरेका छन् ।

१३ देश सहभागी सुपर लिगबाट आयोजक भारत, पाकिस्तान, अष्ट्रेलिया , न्युजिल्याण्ड, बङ्लादेश, दक्षिण अफ्रिका, इङ्ग्ल्याण्ड र अफगानिस्तान सिधा विश्वकपका लागि छनोट भइसकेका छन् । विश्वकप छनोटमा लिग–२ बाट नेपाल, स्कटल्याण्ड र ओमानले स्थान बनाएका छन् । त्यस्तै, विश्वकप प्लेअफ क्वालिफायरबाट अमेरिका र यूएई शीर्ष दुईमा रहँदै विश्वकप छनोटमा पुगेका छन् ।