१६ असार २०८०, शनिबार ०७:२९ बुधवार साप्ताहिक, नयाँबानेश्वर, काठमाण्डौं

रौतहटमा आमा–छोरी मृत फेला

१६ असार, रौतहट । रौतहटको मौलापुर नगरपालिका–४ पतौरामा एक २४ वर्षीया महिला र दुई बर्षीया बालिका मृत फेला परेका छन् । रौतहटका प्रहरी उपरीक्षक वीरबहादुर बुढामगरका अनुसार २४ वर्षीया माला भन्ने कवितादेवी साह र उनकी दुई वर्षीया छोरी आरुही कुमारी मृत भेटिएका हुन् ।

बालिका आरुही कुमारी पंखामा झुण्डयाइएको अवस्थामा र कविता कुमारीको शव घर बाहिर रहेको भ¥याङमुनि फेला परेको प्रहरी उपरीक्षक बुढामगरले जानकारी दिए । घटना शनिबार बिहान करिव तीन बजे आसपास भए पनि हत्या हो वा आत्महत्या यकिन गर्न गाह्रो रहेको बताउँदै प्रहरी उपरीक्षक बुढामगरले अनुसन्धान भइरहेको बताए । मृतक कविता साहका पति धिरेन्द्र साह र ससुरा नागेन्द्र साहसहित परिवार घटनापछि फरार छन् ।

माधवनारायण नगरपालिका–५ मिठुअवा घर भएका मृतक कविता साहका बुवा विजय शंकर साहका अनुसार घटनाबारे आफूलाई स्थानीय लखिन्द्र साहले फोन गरेको जानकारी दिएको बताएका छन् ।

छोरी र ज्वाइँबीच पटक–पटक बिवाद हुँदा आफूले मिलेर बस्न सम्झाइ बुझाइ गर्दै आएको बिजयले बताएका छन् । ज्वाइँ धिरेन्द्र साह र सम्धीसहितका व्यक्ति मिली हत्या गरेको मृतक कविता साहको बुबा विजयले आरोप लगाएका छन् । दाइजोमा थप नगद सिक्री औंठी नदिएको रिसमा घटना भएको माइती पक्षको आरोप छ ।