१५ मंसिर २०८०, शुक्रबार ०६:११ बुधवार साप्ताहिक, नयाँबानेश्वर, काठमाण्डौं

शेखर कोइरालाले उद्घाटन गर्ने सम्मेलन संस्थापनले बहिस्कार गर्ने

१५ मंसीर, काठमाडौं । पश्चिमनवलपरासीमा नेपाली कांग्रेसको दुई गुटको विवाद पुनः सतहमा आएको छ । आज नेपाली काङ्ग्रेसका वरिष्ठ नेता डा शेखर कोइरालाले उद्घाटन गर्ने पहिलो जिल्ला भेला संस्थापन पक्षले बहिष्कार गर्ने भएको छ। विभिन्न माग राखेर असहमति जनाउँदै संस्थापन पक्षले कार्यक्रम बहिष्कार गर्ने घोषणा गरेको हो ।

नवलपरासीमा जिल्लामा बिक्रम खनालले इतर समूहको नेतृत्व गरेका छन् भने नेता देवेन्द्रराज कंडेलले संस्थापन समूहहको नेतृत्व गरेका छन् ।

दुई गुटले नै एक अर्काको कार्यक्रममा असहमति जनाउँदै आइरहेका छन् । पार्टीका जिल्ला सभापति अर्जुनकुमार पोखरेलले एकलौटी रुपमा पार्टी चलाउन खोजेको,केन्द्रको निर्देशन अवज्ञा गरेको र गुट निकटका ब्यक्तिहरुलाई मात्र मनोनित गरेको लगायतका असहमति रहेको संस्थापन पक्षका नेता मोहन शर्माले जनाएका छन् । विद्यानअनुसार चल्नु पर्छ कि पर्दैन,वडागत तहबाट सम्मेलन भएर आउनुपर्छ भन्ने लगायतका माग राख्यौं, सभापतिजीले सुन्नुभएन, त्यसैले हाम्रा साथीहरु आजको भेलामा उपस्थित हुन्ननू, शर्माले भनेका छन् ।

देवेन्द्रराज कंडेल (सस्थापन) पक्षधरले जिल्लामा रहेको केन्द्रीय सदस्यहरू, प्रदेशसभा सदस्यहरुसहित भ्रातृसंगठनले समेत आपत्ति जनाइरहँदा जबर्जस्ती जिल्ला सम्मेलन गर्न खोज्नु गलत भएको नेता मोहन शर्माको भनाइ छ ।