पोखरा — गण्डकी प्रदेशमा नयाँ मन्त्रिपरिषद् गठन भएसँगै नवनियुक्त मन्त्रीहरूले आज पद तथा गोपनियताको शपथ लिएका छन्। प्रदेश प्रमुख डिल्लीराज भट्ट ले मुख्यमन्त्री सुरेन्द्र पाण्डे को सिफारिसमा मन्त्रीहरूलाई शपथ ग्रहण गराएका हुन्।

नयाँ गठन भएको ९ सदस्यीय मन्त्रिपरिषद्मा सत्तारूढ गठबन्धनका दुई मुख्य दल नेपाली कांग्रेस र नेकपा एमालेबीच बराबरी भागबण्डा गरिएको छ। दुवै दलबाट चार–चार जना मन्त्री समावेश गरिएका छन्।

कांग्रेसबाट जित शेरचन अर्थमन्त्री नियुक्त भएका छन् भने नन्दप्रसाद न्यौपानेले ऊर्जा, जलस्रोत तथा खानेपानी मन्त्रालयको जिम्मेवारी पाएका छन्। रेखा गुरुङ सामाजिक विकास, युवा तथा खेलकुद मन्त्री बनेकी छन् भने नम्डु गुरुङ वन तथा वातावरण मन्त्री नियुक्त भएका छन्।

त्यसैगरी एमालेबाट गोविन्द बहादुर नेपाली भौतिक पूर्वाधार तथा यातायात मन्त्री बनेका छन्। यशोदा रिमालले उद्योग तथा पर्यटन मन्त्रालय सम्हालेकी छन् भने लक्ष्मण पाण्डे कृषि, भूमि व्यवस्था तथा सहकारी मन्त्री नियुक्त भएका छन्। भीम कार्की स्वास्थ्य मन्त्री बनेका छन्।

नयाँ मन्त्रिपरिषद् गठनसँगै यसअघि कार्यरत मन्त्रीहरूलाई पदमुक्त गरिएको छ। गठबन्धन सरकारअन्तर्गत गरिएको यो पुनर्गठनलाई राजनीतिक सन्तुलन कायम गर्ने प्रयासका रूपमा हेरिएको छ।