३ बैशाख २०८३, बिहीबार ०२:१४ बुधवार साप्ताहिक, नयाँबानेश्वर, काठमाण्डौं

पेट्रोलियम पदार्थको मूल्यवृद्धि: डिजेल २३७ पुग्यो, निगम अझै घाटामै

काठमाडौं: नेपाल आयल निगम ले पेट्रोलियम पदार्थको मूल्य वृद्धि गरेको छ। निगमले आजदेखि लागू हुने गरी डिजेल, मट्टीतेल तथा आन्तरिक हवाई इन्धनको मूल्य बढाएको जनाएको हो। पछिल्लो मूल्य समायोजनअनुसार डिजेल र मट्टीतेलमा प्रतिलिटर ३० रुपैयाँ वृद्धि गरिएको छ भने आन्तरिक हवाई इन्धनमा प्रतिलिटर ५ रुपैयाँ बढाइएको छ।

नयाँ मूल्यसूची लागू भएसँगै डिजेल तथा मट्टीतेलको मूल्य प्रतिलिटर २३७ रुपैयाँ पुगेको छ भने आन्तरिक हवाई इन्धनको मूल्य प्रतिलिटर २५६ रुपैयाँ निर्धारण गरिएको छ। इन्धनको मूल्यवृद्धिले यातायात, ढुवानी र बजार मूल्यमा प्रत्यक्ष असर पार्ने भएकाले उपभोक्तामाथि थप आर्थिक भार पर्ने देखिएको छ।

निगमका अनुसार मूल्य वृद्धि गरे पनि इन्धन कारोबार अझै घाटामै रहेको छ। अन्तर्राष्ट्रिय बजारमा मूल्य उच्च रहँदा र लागत मूल्य बढी भएका कारण बिक्री मूल्य समायोजन गर्दा पनि पूर्ण रूपमा घाटा न्यूनीकरण हुन सकेको छैन। हाल पेट्रोलमा प्रति लिटर २ रुपैयाँ ३२ पैसा, डिजेलमा ८७ रुपैयाँ ९९ पैसा र मट्टीतेलमा ३६ रुपैयाँ ७० पैसा घाटा रहेको निगमले जनाएको छ। त्यस्तै खाना पकाउने एलपी ग्यासमा प्रति सिलिण्डर ३३१ रुपैयाँ २५ पैसा घाटा कायम रहेको छ। समग्रमा निगमको पाक्षिक घाटा करिब ७ अर्ब ८१ करोड ६१ लाख रुपैयाँ पुगेको बताइएको छ।

निगमले मूल्यवृद्धिको मुख्य कारण अन्तर्राष्ट्रिय बजारमा इन्धनको मूल्यमा भएको वृद्धि र Indian Oil Corporation बाट प्राप्त नयाँ मूल्यसूचीलाई मानेको छ। निगमले लागत मूल्य उच्च र बिक्री मूल्य तुलनात्मक रूपमा कम हुँदा मूल्य समायोजन अपरिहार्य बनेको दाबी गरेको छ।

इन्धनको मूल्यमा भएको यो वृद्धिले दैनिक उपभोग्य वस्तुको मूल्यमा समेत प्रभाव पार्ने सम्भावना रहेको छ। विज्ञहरूका अनुसार यस्तो अवस्थाले समग्र बजारमा महँगी थप चुलिन सक्ने संकेत देखिन्छ। यद्यपि, निगम घाटा कम गर्ने दबाबमा रहेकाले तत्काल मूल्य घट्ने सम्भावना न्यून रहेको आकलन गरिएको छ।