३ बैशाख २०८३, बिहीबार ०८:३३ बुधवार साप्ताहिक, नयाँबानेश्वर, काठमाण्डौं

कांग्रेस विवाद सर्वोच्चमा: आयोगको निर्णयविरुद्ध देउवा पक्षको रिटमाथि सुनुवाइ जारी

काठमाडौं । निर्वाचन आयोगको निर्णयविरुद्ध नेपाली कांग्रेसको संस्थापन पक्षले दायर गरेको रिटमाथि सर्वोच्च अदालतमा सुनुवाइ जारी रहेको छ।

न्यायाधीशद्वय शारंगा सुवेदी र नृपध्वज निरौलाको इजलासमा उक्त रिटमाथि बहस भइरहेको हो। देउवा पक्षबाट सर्वोच्चमा दुईवटा छुट्टाछुट्टै निवेदन दर्ता गरिएका छन् र दुवैको सुनुवाइ सँगसँगै अघि बढिरहेको छ।

देउवा पक्षले गत २६ चैतमा पार्टीको महाधिवेशनको कार्यसूची रोक्न माग गर्दै पहिलो रिट दायर गरेको थियो। त्यसपछि विवादको टुंगो नलागेसम्म १५औँ महाधिवेशनको कार्यतालिका कार्यान्वयन नगर्नुपर्ने मागसहित अर्को रिट दर्ता गरिएको छ। यसअघि भने पार्टीको आधिकारिकताको विषयलाई लिएर पनि रिट परेको थियो।

निर्वाचन आयोगले गगन कुमार थापा नेतृत्वको कांग्रेसलाई आधिकारिकता दिएपछि देउवा पक्षधरले उक्त निर्णय संविधान, प्रचलित कानुन र पार्टी विधानविपरीत रहेको दाबी गर्दै बदर गर्न माग गरेका हुन्।

रिटमा निर्वाचन आयोग, गगन कुमार थापा, विश्वप्रकाश शर्मा तथा विशेष महाधिवेशनबाट निर्वाचित भनिएको गगन थापा नेतृत्वको नेपाली कांग्रेस केन्द्रीय कार्यसमितिलाई विपक्षी बनाइएको छ।

देउवा पक्षले गगन थापा पक्षले अघि बढाएको महाधिवेशनको तयारी तत्काल रोक्नुपर्ने माग गर्दै आएको छ। आयोगको माघ २ गतेको निर्णयलाई नै विवादको जड मानिएको छ।

के हुन्छ अब?

सर्वोच्च अदालतको आगामी आदेशले कांग्रेसभित्रको शक्ति संघर्ष र महाधिवेशनको कार्यतालिकामा प्रत्यक्ष असर पार्ने देखिएको छ। अहिलेको सुनुवाइलाई राजनीतिक रूपमा अत्यन्त चासोका साथ हेरिएको छ।