४ बैशाख २०८३, शुक्रबार १०:५४ बुधवार साप्ताहिक, नयाँबानेश्वर, काठमाण्डौं

ठमेलमा अनैतिक गतिविधि नियन्त्रण: २० युगाण्डेली महिला एक वर्षका लागि प्रतिबन्धित

काठमाडौं । काठमाडौंको ठमेल क्षेत्रमा पक्राउ परेका २० विदेशी महिलालाई नेपाल आउन नपाउने गरी डिपोर्ट गरिएको छ। अनैतिक क्रियाकलाप तथा अभद्र व्यवहार गरेको आरोपमा उनीहरूलाई नियन्त्रणमा लिइएको थियो।

प्रहरीका अनुसार उनीहरू फायरचोक आसपासबाट पक्राउ परेका थिए। बाटो हिँड्ने स्वदेशी तथा विदेशी पर्यटकलाई लक्षित गरी अश्लील प्रस्ताव राख्ने, बाटो छेकी दुःख दिने जस्ता गतिविधिमा संलग्न रहेको आरोप छ।

उनीहरूमाथि प्रहरी वृत्त सोह्रखुट्टे मार्फत अभद्र व्यवहारको कसुरमा मुद्दा चलाइएको थियो। पछि जिल्ला प्रशासन कार्यालय काठमाडौं ले प्रतिव्यक्ति १० हजार रुपैयाँ धरौटीमा रिहा गर्न आदेश दिएको थियो।

रिहा भएपछि उनीहरूलाई अध्यागमन विभाग लाई बुझाइएको थियो। विभागले एक वर्षसम्म नेपाल प्रवेश गर्न नपाउने गरी उनीहरूलाई डिपोर्ट गरेको जनाएको छ।

यसअघि पनि सोही क्षेत्रमा यस्तै गतिविधिमा संलग्न विदेशी महिलाहरू पक्राउ परेर डिपोर्ट गरिएका थिए। प्रहरीले ठमेल क्षेत्रमा यस्ता गतिविधि नियन्त्रण गर्न निगरानी अझ कडा बनाएको जनाएको छ।