४ बैशाख २०८३, शुक्रबार १४:५४ बुधवार साप्ताहिक, नयाँबानेश्वर, काठमाण्डौं

प्रहरी तथ्यांक: महिलासँगै पुरुषमाथि पनि घरेलु हिंसा बढ्दै

काठमाडौं । काठमाडौंमा घरेलु हिंसाका घटनामा पुरुष पीडितको संख्या बढ्दै गएको तथ्य सार्वजनिक भएको छ। नेपाल प्रहरी अन्तर्गत जिल्ला प्रहरी परिसर काठमाडौंका अनुसार पछिल्लो ६ महिनामा मात्रै ९८ जना पुरुषले आफू घरेलु हिंसामा परेको भन्दै उजुरी दिएका छन्। परिसरका प्रवक्ता एसपी पवनकुमार भट्टराईका अनुसार विगतमा घरेलु हिंसा मुख्यतः महिलासँग जोडेर हेर्ने गरिएको भए पनि पछिल्लो समय पुरुषहरूबाट समेत उजुरी आउने क्रम उल्लेखनीय रूपमा बढेको छ।

प्रहरीका अनुसार यस अवधिमा १३ जना पुरुषले ठाडो उजुरीसमेत दिएका छन्। यस्तै, सोही अवधिमा ६२९ महिलाले घरेलु हिंसासम्बन्धी उजुरी दिएका छन् भने २९९ वटा ठाडो निवेदन दर्ता भएका छन्। यसले घरेलु हिंसा अझै पनि समाजमा गम्भीर समस्याका रूपमा रहेको देखाउँछ, जहाँ महिला र पुरुष दुवै पीडित बन्ने गरेका छन्।

प्राप्त उजुरीका आधारमा प्रहरीले पीडितहरूलाई आवश्यक सहयोग उपलब्ध गराउँदै आएको छ। कतिपयलाई मनोसामाजिक परामर्श सेवा प्रदान गरिएको छ भने गम्भीर अवस्थामा रहेका पीडितलाई सुरक्षित आवासका लागि विभिन्न संघसंस्थासँग समन्वय गरी पठाइएको छ। प्रहरीका अनुसार घरेलु हिंसाको समस्या समाधानका लागि कानुनी कारबाहीसँगै सचेतना र परामर्श सेवाको भूमिका महत्वपूर्ण रहेको छ।