२५ असार २०७८, शुक्रबार ०७:२९ बुधवार साप्ताहिक, नयाँबानेश्वर, काठमाण्डौं

बाढीका कारण बनेपा बजारको ‘बेहाल’

२५ असार, काठमाडौं । काभ्रेको बनेपास्थित पुल बजार क्षेत्र हरेक वर्ष जस्तै शुक्रबार पनि डुबानमा परेको छ । हरेक वर्ष हुने डुबानको समस्या समाधान नहुँदा स्थानीय समस्यामा पर्दै आएका छन् ।

शुक्रबार बिहान पनि राजमार्गमा साना गाडी नै डुब्ने पानी जम्मा भयो । साना चार पांग्रे गाडीहरु आधा डुबेको देखिन्थ्यो । पैदलयात्रुले त्यो भल हुँदै बाटो पार गर्नै सकेनन् । मोटरसाइकल चढेर बाटो पार गर्न खोज्नेहरु भलमै लडे । वरपरका घर–पसल पनि जलमग्न भएका छन् ।

पुण्यमाता खोलाको बाढीले हरेक वर्ष पुल बजार क्षेत्र डुबानमा पर्दछ । अतिक्रमणको कारण खोला साँघुरो छ । अलि ठूलो पानी पर्नासाथ पानी ओभरफ्लो भएर सडक पूरै ढाक्छ । बनेपा बजारमै गाडी डुबाउने भल पार गर्दै गन्त्वयमा पुग्नुपर्ने बाध्यता हरेक वर्ष आइलाग्छ । तर यो समस्याको दीर्घकालीन समस्याको समाधान हुन सकेको छैन ।

शुक्रबार बिहान पुण्यमाता खोलाको बाढीले आधा घण्टा जति सडक अवरुद्ध भएको थियो ।