३१ भाद्र २०७८, बिहीबार ०८:१९ बुधवार साप्ताहिक, नयाँबानेश्वर, काठमाण्डौं

देउवाको गृह जिल्लामा फेरि वडा अधिवेशन गर्नुपर्ने पौडेल समूहको अडान

३१ भदौं , काठमाडौं । कांग्रेसका वरिष्ठ नेता रामचन्द्र पौडेल समूहले सभापति शेरबहादुर देउवाको गृह जिल्ला डडेल्धुराको वडा अधिवेशनका सन्दर्भमा निर्वाचन समितिलाई ध्यानाकर्षण गराउने भएको छ । पौडेल समूहले २५ भदौमा डडेल्धुरामा भएको वडा अधिवेशन बहिष्कार गर्दै पुनः अधिवेशन गराउन माग गर्दै आएको छ ।

नेपाली कांग्रेसका वरिष्ठ नेता रामचन्द्र पौडेल समूहले प्रधानमन्त्री एवम् सभापति शेरबहादुर देउवाको गृह जिल्ला डडेल्धुरामा पुनः वडा अधिवेशन गर्नुपर्ने अडान राखेको हो ।

आज (बिहीबार) केन्द्रीय निर्वाचन समितिका पदाधिकारीलाई भेटेर समेत त्यसबारे ध्यानाकर्षण गराउन लागेको एक केन्द्रीय सदस्यले जानकारी दिए । दिउँसो २ बजे निर्वाचन समितिको कार्यालय रहेको पार्टी केन्द्रीय कार्यालयमा वरिष्ठ नेता पौडेलसहितका नेताहरु जाने कार्यक्रम तय भएको उनको सचिवालयले जनाएको छ ।

सचिवालयका अनुसार पौडेलसँगै महामन्त्री डा. शशांक कोइराला, कोषाध्यक्ष सीतादेवी यादव, नेताहरु प्रकाशमान सिंह, अर्जुननरसिंह केसी, डा. शेखर कोइराला, डा. मिनेन्द्र रिजाललगायतका नेताहरु सानेपा जान लागेका छन् ।

‘क्रियाशील सदस्यको विवाद र जिल्ला सभापति कर्णबहादुर मल्लसहितको असहमतिका बीच भएको अधिवेशन हामीलाई स्वीकार्य छैन । हामीले यसअघि पनि पुनः वडा अधिवेशन गराउन भनिसकेको छौं, त्यही विषयमा केन्द्रीय निर्वाचन समितिलाई समेत ध्यानाकर्षण गराउने र पुनः वडा अधिवेशनको माग गर्ने हो,’ ती नेताले भने । डडेल्धुरामा केही दिन सम्पन्न वडा अधिवेशनमा धाँधली भएको पौडेल समूहले आरोप लगाउँदै आएको छ ।